Immunity ni Duterte
Gikurhian sa kadagkoan sa embahada sa South Korea ang pangangkon ni Justice Secretary Vitaliano Aguirre nga niawhag sila sa pagpahunong sa imbestigasyon sa posibleng kalambigitan sa Korean mafia sa pagdagit ug pagpatay sa Koreano nga negosyante nga si Jee Ick-joo.
Apan wa patuo si Aguirre. Unsa may ilang mahimo? Nagkinahanglan sila sa tabang pagsulbad sa kamatayon ni Jee, bahala na kon mga polis ra say suspitsado. Gawas pa, si Presidente Rodrigo Duterte mismo ang nibisto sa Korean mafia sa Sugbo, Central Visayas, ug ubang bahin sa Pilipinas.
***
Gipanghimakak nilang kanhi Senador Jamby Madrigal ug Kongresista Lenlen Alonte sa Biñan City nga nisuway sila sa pagsuburno og P100 milyones ngadto sa gikaintapang mga piniriso aron bakwion ang ilang testimoniya batok ni Senador Leila de Lima.
Apan wa magtagad si Aguirre pagpakita og mga ebidensiya sa iyang pasangil. Kay unsa may mahimo nilang Madrigal ugAlonte? Mangahas ba sila sa pagsukol niAguirre, nga usa sa labing sinaligan ni Duterte? Ganahan ba sila nga mahisama ni de Lima nga human pakauwawi karon nabalhog na gyod sa prisohan?
*** Gisalikway sa kapolisan ang pangangkon ni Aguirre nga gibanhigan ang iyang tinubdan sa kasayuran sa ibabaw, si Lalaine Madrigal Martinez, asawa sa konbiktadong kidnapper nga si Noel Martinez nga nisaksi sab batok ni de Lima.
Apan wa ni kapugong ni Aguirre pagsugo sa National Bureau of Investigation pagsusi sa iyang mga pangangkon mahitungod sa pagpamanhig ug Korean mafia. Bisan nahinayak nag panghimakak, kinsa may polis nga mangahas paglalis sa bisan unsang kasayuran nga iyang mahunahunaan nga ipahibawo sa publiko?
***
Kon nakuryente man si Communications Secretary Martin Andanar sa nihungaw nga pasangil nga gitanyagan og tag-$1,000 ang reporters nga ni-cover sa press conference ni SPO3 Arturo Lascañas, peligrong ma-electric chair si Aguirre sa mas kataw-anan niyang pangangkon.
Apan unsa may kabalak-an nilang Andanar ug Aguirre? Seguro silang duphan ni Duterte, nga ubos sa bag-ong pamunoan susama ka-epektibo sa immunity. Mas daghang nitambong sa kalihokan pagsuportang Duterte kay sa pagsaulog sa EDSA People Power Revolution niadtong Sabado, way mangahas og paningil sa ilang kasaypanan. Mabasol ba kon nagtuo na nga dawaton sa katawhan bisan unsay ilang binuang?