Pagpapas sa PUJs

Makalili ta unsay mahitabo sa pagpatuman sa mass transport system, nga gipasalig nga di hingpit nga makahunong apan igo lang mopabalhin sa operasyon sa Public Utility Jeepneys (PUJs) sa maigo nga kadalanan, atol sa pagtukod sa Bus Rapid Transit (BRT) sa Dakbayan sa Sugbo karong tuiga.

Gikabalak-an nga mahulga ang panginabuhi sa kaliboan ka PUJ drivers ug operators sa pagsugod og hikyad sa higanteng agianan sa BRT gikan sa Barangay Bulacao sa habagatan hangtod sa Barangay Talamban sa amihanan, latas sa Natalio Bacalso Ave., Osmena Blvd. ug ubang dagkong kadalanan. Sayon kaayong istoryahon nga aron di maglisod sa pagkaton og bag-ong mga katakos ug mga panginabuhi, ang PUJ drivers ug operators ug mga sakop sa ilang pamilya librehon sa ilang matrikula sa Technical Skills Development Authority (TESDA).

Apan unsa may kan-on sa ilang pamilya sa pipila ka buwan nga di sila makapamasahero kay mangeskuyla sa ilang mapilian nga mga kurso sa TESDA? Pasalig sa mga tigpasiugda sa BRT nga hatagan sila og inadlaw nga allowance, nga ambas sa minimum nga suholan, ug hinabang alang sa plitehan gikan ug padung sa ilang bay ug eskuylahan. Nga mahimong maoy yawe sa pag-iban sa kasakit sa kuti nga paghingilin sa PUJs ug paghangop sa BRT ug ubang mass transport system. Gawas sa abundang mga pasalig, angay sang mogasto ang gobyerno og dakong pundo aron paghimong mas sayon sa transition.

Nagkinahanglan hinuon og mas abundang politikanhong kaisog sa hingpit nang pagpapas sa PUJs. Nga maoy bentaha ni Presidente Rodrigo Duterte sa nangaging mga pamunoan. Mao bay hinungdan nganong karon pa lang nikisikisi nang daan ang transport groups?