Wa nay tinagoan
Sa makausa pa, tungod sa road rage incident nilang David Lim Jr. ug sa iyang gipusil nga si Ephraim Nuñal, napahinumdoman ta sa kadako sa gahom sa social media ug sa mas dakong gahom nga nahatag sa social media ngadto sa matag usa.
Nakit-an nato ang insidente tungod sa dash cam sa sakyanan nga nahimutang sa tukmang dapit sa tukmang
panahon. Kansang tag-iya klarong wa magpaabot sa insidente apan wa sab managana sa pagpakigsawo sa kasayuran ngadto sa kapolisan sa panghinaot nga masulbad sa labing daling panahon ang kontrobersiya.
***
Kon talawan pa ang tag-iya sa dash cam gitagoan unta niya ang ebidensiya hangtod nga maklaro na unsay dagan sa kaso ug kinsa ang mga hingtungdan. Apan gipamatud-an nga sulundon siyang sakop sa katilingban pinaagi sa paghatod sa nagkadugo nga si Nuñal sa kinadul-ang ospital ug paghatag dayon sa footage sa insidente ngadto sa mga imbestigador sa Homicide Section sa Cebu City Police Office (CCPO).
Ang bisan unsang pagduda sa iyang kaisog ug kaligdong napapas sa iyang pagtanyag sa paghatag sa iyang testimoniya sa korte kon mahusay nang kaso. Kon paundayonan sa mga Lim ang pasangil nga gimaniobra ang video, mameligrong mahagbong sa mas lawom nga gahong.
***
Katuohan ang pangangkon sa tag-iya sa video nga
wa makuhai ang unang bahin sa lalis nilang Lim ug Nuñal kay wa siya magtuo nga modako ang panagsungi ug mosangpot sa pagpamusil. Naklaro sab nga way laing kauban si Nuñal nga nanghudlat ni Lim aron nga magpalaban og pistola.
Makahatag og mas hingpit nga hulagway sa insidente ang CCTV sa kadalanan nga ilang naagian. May kahigayonan hinuon nga suok rang nahitaboan ug wa mataori og CCTV.