Problema sa drainage

Karon nga si Konsehal Jerry Guardo alyado na sa Bando Osmeña Pundok Kauswagan (BOPK), ang grupo nga gipangulohan ni Mayor Tomas Osmeña, naglaum ko nga matagad na niya ang problema sa drainage ug ang kamapahimuslanon sa ubang nagpuyo daplin sa kasapaan.

Sigurado ko nga si Guardo itudlo ni Mayor Osmeña isip iyang deputy mayor for infrastructure kay mao kini ang gusto sa konsehal nga iyang hatagan og pagtagad, ilabi na ang pagsulbad sa paglunop sa downtown area kon mag-uwan.

Wala malilong ni Guardo nga adunay P700 milyones nga salapi gikan sa nasudnong kagamhanan nga gitagana sa lainlaing drainage projects dinhi sa dakbayan. Nagtuo man gani ko nga kining dakong proyekto nga paghimo og sapa diha sa dalan Colon, diha niini kuhaa ang kuwarta.

Maayo nga tan-awon pag-ayo ni Guardo kon dili ba lang mausik ang kuwarta sa kagamhanan nga gigasto sa mga proyekto nga walay kapuslanan.

Bisan gani kining nagpadayon nga paghimo'g sapa diha sa dalan Colon nga subra kuno sa P50 milyones ang kantidad, dili gayud sulbad sa paglunop sa downtown area kon maguwan.

Kining maong proyekto mao pa ang makamugna og dakong problema unya kon ang kaliboan ka linya sa telepono mangabugto kay anaa kini nagbabag sa gihimo nila nga sapa.

Kanunay nako nga gibantayan kining maong proyekto nga mahulagway nga pag-usik-usik ra sa kuwarta sa kagamhanan. Subo lang nga palandungon nga wala pay bisan usa ka opisyal sa kagamhanan nga nagpakabana niini.

Bisan gani ang mga sakop sa media wala pa masayod nga may sapa diay nga gimugna karon nga anha motadlas sa dalan Colon. Nakamugna kini og dako kaayo nga kahasol sa mga moagi nga sakyanan kay gisirad-an ang usa ka lane sa karsada.

***

Sukdon nato kon unsay mahimo sa Office of the Building Official (OBO) sa Dakbayan sa Sugbo sa pagsumpo sa mga illegal construction.

Dunay nagpadayon karon nga pagtukod og building tupad sa Colonnade Supermarket habig sa dalan Manalili. Ambot og tinuod ba nga ang construction iya gihapon sa mao nga supermarket.

Mora og gisuwayan na usab pagtabon ang sapa nga sumpay sa gitawag og Parian Creek aron ilakip sa luna nga tukoran og building. Ang balaod naglatid nga kun magtukod gani og building, o bisan estraktura, daplin sa sapa, kinahanglang binlan gyud og labing menos tulo ka metros habig sa sapa.

Kun wala man kini pagtugot sa OBO ang ilang gihimo, angay'ng molihok ang maong opisina nga gipangulohan ni City Engineer Josefa Ylanan. Lagmit gani niini, ang desinyo sa pagatukoron nila nga building, wala sa'y setback gikan sa ilang property line sa habig sa karsada.

Ang gitawag og "property line" mao ang luna nga gikan sa utlanan sa aseras, dili kay gikan sa gutter. Gikan sa property line, kinahanglang ibakante ug labing menos lima ka metros. Nakabantay ko nga hinay gyud ang OBO sa ilang gimbuhaton.

Diri sab sa dalan V. Gullas (tupad sa Plastic and Things building) dunay nagbag-o og balay nga wala gihapon mogahin og setback. Samtang giisyuhan kuno og Notice of Violation, apan walay hunong ang ilang pagtrabaho sa estrakstura.