Nganong nahudlat ni Leni
Dihang gidid-an nila si Bise Presidente Leni Robredo sa pagtambong sa mga tigom sa gabinete, nagtuo sila nga magpakahilom na lang siya. Dihang giisnab nilang PNP Director General Bato dela Rosa ug DILG Secretary Mike Sueno ang iyang suwat pakisayod sa mga detalye sa gubat batok sa ilegal
nga drugas, gipakaingon nila nga mangiyugpos lang siya.
Nakalimot sila sa iyang kaligdong, katakos ug kaisog sa pagbarug bisan sa nasudnong pagbangotan sa pagkamatay sa iyang bana ug sa pagsuway paghulip sa dakong haw-ang nga gibiyaan ni anhing DILG Secretary Jesse Robredo.
***
Dihang gipanamastamasan nila ug gibutang-butangan og bisan unsa na lang baho ug lapok pinaagi sa organisadong mga turutot sa social media, gipakaingon nila nga mohupo ug mohunong na sa pagpanginlabot ug pagpakabana.
Nataligam-an nila giunsa niya pagbuntog ang kakuwang og kasayuran mahitungod niya pinaagi sa pagpanuktok sa mga tanlag ug mga kasingkasing sa mga molupyo sa labing hilit nga mga suok sa nasud aron pagasoy sa iyang sugilanon sa pag-unong sa nalaktawan ug nataligam-an nga mga hut-ong sa katilingban aron nga kahatagan sila og tingog makaangkon og makiangayon nga kahigayonan ang ilang mga pangandoy.
***
Dihang gipasanginlan siya ni kanhi Senador Bongbong Marcos nga nanikas sa piniliay ug dihang nagsublisubli
pagpasalig si Duterte nga si Marcos ang mopuli sa pagduma sa nasud kon mausab nang konstitusyon ug ang sistema sa gobyerno, gipakaingon nila nga motalaw siya ug magkuray nga motahan.
Nagdumili sila pag-ila sa katalagsaon sa iyang pagluba sa usa sa labing gamhanan nga makinarya sa nanggungis nang politikanhong dinastiya bisan sa iyang politikanhong kalinghod ug kagamay nga maoy makapahagsa sa mga pasangil nga iyang gimaniobra ang niaging piniliay.
***
Di na bag-o ang mensahe ni Robredo sa United Nations. Kadaghan na balika sa mga kaatbang ni Duterte ug sa lokal ug langyaw’ng mga sakop sa media. Ang kinadak-ang bahin gisubli-subli na man gani pag-angkon ni Duterte sa inadlaw niyang mga diskurso.
Apan nganong mora mang gilubat-lubatan ang pamunoan sa pagtingog ni Robredo? Kay si Robredo nipasundayag sa tanang nakamenos sa iyang kaligdong, katakos ug kaisog. Ug isip ikaduhang labing taas nga opisyal sa nasud siya’y labing lehitimo nga alternatibo sa pagbinastos, pagpanghawod ug pagpanlaktod sa balaod.