Bag-ong rebolusyon
Gihangop uban sa tumang kahinam ang pahibawo sa Facebook nga nag-umol sila og teknolohiya nga mohimong mas sayon sa komunikasyon. Ang mga tigpasiugda sa ilang silent speech system nipasalig nga sa mosunod nga duha ka tuig ila nang maumol ang teknolohiya nga:
•Mohawan sa agianan sa pagbinayloay og mensahe sa way panginahanglan sa pagsuwat ni pagsulti; ug kon matinuod
•Ang atong hunahuna makapadayag og 100 ka pung matag gutlo, o lima ka pilo ang kapaspas kay sa atong mahimo karon sa personal computers ug smart phones.
***
Ang pangu sa Building 8 project sa FB, si Regina Dugan, nga gikan sa Google ug Defense Advanced Research Projects Agency (DARPA) sa Pentagon sa Estados Unidos, nipasalig nga ang teknolohiya wa magkinahanglan og implant sa utok o bisan unsang tusok sa bisan asang bahin sa atong lawas.
Matod ni Dugan nagplano sila paggamit og kawo o headband nga mobasa sa atong hunahuna ug mopadangat sa mensahe pinaagi sa text messaging. Ang unom ka buwan nang proyekto gisalmotan sa 60 ka eksperto gikan sa Johns Hopkins, University of California, Berkeley, ug University of California, San Francisco, ug nasentro sa pagpangita og paagi sa paggamit og suga, sama sa LED o lasers, pagkuha sa signals gikan sa cerebral cortex sa atong utok.
***
Di orihinal sa FB ang ideya. May nangagi nang mga pagtuon sa pagpahigayon og komunikasyon pinaagi sa utok alang sa mga pasyente nga nawad-an og kahayag ug katakos sa pagsulti ug pagsuwat.
Di hinuon masaaron ang pasiunang mga eksperimento nga naglambigit og brain implants. Kay gawas nga lisod pang ipadawat sa kinabag-an sa katawhan, 50 porsiento o katunga ra sa mga pung nga nabasa pinaagi sa brainwaves ang tukma. Sa ato pa, sayop ang laing katunga.
***
Gipanghinaot hinuon nga ang dakong puntil sa FB mas makapaspas sa pagpalambo sa teknolohiya. Nga di lang makatabang sa mga masakiton apan makamugna og bag-ong rebolusyon sa komunikasyon nga mobuntog sa managlahi nga pinulongan sa kanasuran.
Angayng hangpon ang mga proyekto sa FB, Google ug ubang higanteng kompaniya. Nga gitumong pagsulbad sa kalibotanong mga suliran ug paghimong mas sayon sa inadlaw-adlaw natong pagpuyo. Di lang sa pagpaburot sa ilang ginansiya.