DPS garbage collectors nanguwarta sab

May mga tawo na nga nagbagulbol tungod kay ang mga garbage collector sa Department of Public Services (DPS) sa Dakbayan sa Sugbo dugay kaayong makahakot sa mga basura nga nagliundok sa ilang mga dapit.

Ang trabaho sa mga garbage collectors nga gisweldohan sa kagamhanan sa Dakbayan sa Sugbo mao ra ang paghipos sa mga basura nga gipanglabay sa katawhan daplin sa karsada.

Ang mga garbage collectors sa DPS mohakot niini ngadto sa pribadong transfer station sa Barangay Inayawan nga giabangan sa private hauler nga gikontrata sa City Hall aron hakuton ang basura paingon sa landfill.

Sa ato pa, duol ra unta kaayo ang dapit nga hatdan sa mga basura sa garbage truck sa City Hall, apan nahibulong ang katawhan nganong kanunay man sila nga makakita og nagliundok nga basura nga wala mahakot?

Tungod sa maong talan-awon, dili kalikayan nga ang katawhan magduda nga hayan nagmika ra ang mga tigkolekta sa basura sa ilang gimbuhaton. Usa sa makapalangay sa trabaho sa mga garbage collectors mao ang pagpanghagpat nila sa mga butang nga ilang ikabaligya.

Gikompetensyahan nila ang mga tigpanguykoy og basura nga nagpaabot didto sa transfer station. Ang uban makasabot nga tungod kay dili kaayo dagko og sweldo ang mga garbage collector sa City Hall, mao’y rason nga magsideline sila pagtigum og ilang makuwartahan.

Apan tungod sa ilang gihimo, masakripisyo ang katawhan nga mao’y nagsweldo kanila gikan sa ilang mga buhis. Kini mao’y angay unta nga hatagan og pagtagad sa mga opisyal nga nagdumala sa Dakbayan sa Sugbo aron mopaspas ang pagpangolekta og basura sa atong mga garbage collectors.

* * *

Dili malalis nga peligro g’yud ang pagpasakay og bata sa mga motorsiklo, ilabi na ang mga masuso pa. Kun mahitabo nga madisgrasya ang motor ug matumba, luoy g’yud tawon ang bata.

Ang uban sab nga mga ginikanan, maglibre lang og ila. Ang papa nga mao’y sagad mag-drive sa motor, nakahelmet, ang asawa nga nag-angkas ug nagkugos sa bata, may helmet sab, apan ang bata, wala’y helmet.

Unsa man ang buot ipasabot niini? Mosugot ra ba mo nga mabuak ang ulo sa inyong anak? Apan kining Republic Act 10666, kun Children’s Safety on Motorcycle Law, daghan ang masakripisyo niini.

Husto si Mayor Tomas Osmeña nga wala makauyon niining maong balaod. Angkunon nako nga sa makadaghan nga higayon, magpasakay ko sa akong bata sa motor, sukad pa kaniadto.

Apan wala g’yud mahitabo nga kami natumba kay mabinantayon kaayo ko nga momaneho og motor. Husto ang gikabalak-an ni Tommy nga kun estriktuhon g’yud ang pagpatuman niining maong balaod, daghang tinun-an ang maapektohan.

Dili ikalimod nga ang motorsiklo mao’y sagad sakyan sa mga tinun-an, bisan sa pipila ka barangay dinhi sa siyudad. Ihatod sa mga ginikanan ang ilang mga anak pinaagi sa motorsiklo, labaw na didto sa bukid.

Pila ra man gud sa katawhan ang adunay mga fourwheel nga sakyanan. Sagad sa mga tawo motorsiklo ra g’yud ang maabot sa pagpalit. Ang motorsiklo mao ra sab ang madali-dali sa paggamit sa paghatod sa bata sa tunghaan, ilabi na kon magdali.