Panghudlat sa Mindanao
Sukad sa sinugdanan, nagkasungi ang mga sulti nilang Presidente Rodrigo Duterte ug sa kadagkoan sa Armadong Kusog mahitungod sa krisis sa Marawi City:
• Dihang nideklarar dayon si Duterte og martial law sa tibuok Mindanao pila ka oras human ni-atake ang Maute group sa pipila ka bahin sa Marawi, nipahibawo si Defense Secretary Delfin Lorenzana nga wa siya mohimo sa rekomendasyon;
• Samtang nagsubli-subli pagpasalig ang militar nga hapit na masulbad ang krisis, si Duterte nagsige og pasidaan nga ang kaguliyang mahimong mokatap ngadto sa ubang bahin sa nasud;
***
• Sa usa ka bahin, gitataw sa militar nga ang Maute group mahimong nagpa-papel lang aron makadapit sa pagtagad sa liderato sa ISIS sa panghinaot nga makakuha og dakong suporta gikan sa langyaw’ng mga terorista, apan sa pikas sa bahin gitunglo nang Duterte ang Maute group nga sumpay na sa tinai sa ISIS; ug
• Human gitataw sa militar nga wa pay ebidensiya nga nakasud nang ISIS sa Mindanao, si Solicitor General Jose Calida nipahibawo sa Korte Suprema nga di lang usa, di lang duha kon dili 20 na gyod ka grupo sa ISIS ang naglihok karon sa Mindanao.
***
Samtang naningkamot ang militar pagpahiyos sa problema sa Marawi, nga way katakos ang Maute sa pagtukod og base sa ISIS didto ni sa bisan asang bahin sa Mindanao, sukwahi ang mga pangangkon ni Duterte.
Nipasidaan siya nga duol rang Kabisay-an sa Mindanao ug mahimo ganing moabot ang Maute sa Luzon busa mahimong ideklarar ang martial law sa tibuok nasud. Dihang mingaw ang suporta nga nadawat sa posibleng pagpalapad sa martial law, nihudlat si Duterte nga mahimong moulbo ang gubat sibil sa Mindanao.
Mga eksperto sa terorismo nagduda na nga gimaniobra sa pamunoang Duterte ang pagpaburot sa problema sa Marawi. Maong inay dasonan ang mensahe sa pagpakalma sa militar, nagsige og bandilyo nga angay’ng lubat-lubatan ang katawhan kay nameligro sab ang ubang bahin sa nasud.
Nisamot ang mga pagduda nga wa magsulti sa kamatuoran ang pamunoang Duterte dihang gibisto sa mga eksperto nga giapil ni Calida paglambigit sa ISIS ang mga pundok nga wa na maglihok ug ang nagkalainlaing mga ngan sa usa lang ka pundok.