Itoy sa taxi operators

Ang luod ug makauuwaw nga pagka under-the-bunal sa kadagkoan sa Land Transportation Franchising and Regulatory Board (LTFRB) sa gamhanang cartel sa taxi operators sa kaulohan maoy tinuod nga hinungdan sa agresibo nila nga pagpanggukod sa Uber, Grab ug ubang alternatibong mga sakyanan.

Kapila na ka mabiktima sa mga taxi nga manlubag, mangisnab ug manikas apan nasiyam-siyaman og pinaabot nga matabangan sa LTFRB, kana kon naatiman man? Apan dihang nitiyabaw ang taxi operators sa hulga sa ilang negosyo, morang gilian ang taga LTFRB nga nanghasi sa Uber, Grab ug ubang mapangahason.

***

Di ta moadto og layo. Usa sa labing nangalisbo nga konsabo tali sa LTFRB ug taxi operators nahitabo dinhi sa atong kaugalingong tugkaran: 2,000 ka kolorum nga taxi units dinhi sa Sugbo ang gitugotan sa kurakot nga opisyal sa LTFRB (nga di lang nganlan kay patay na ug di nang kapanalipod sa iyang kaugalingon.)

Nabisto ang binuang sa isog nga opisyal nga nakapuli sa katungdanan. Iyang nasakpan nga peke ang mga dokumento sa rehistrasyon. Napamatud-an ang anomaliya sa audit team nga gipada sa ulohang buhatan sa LTFRB.

***

Inay malipay ang taxi operators sa Sugbo nga nasakpan ang 2,000 ka kolorum nga taxi units nga di makiangayon nga

nakigribal sa ilang negosyo, labihan nilang hiloma. Wa gyod silang kahunahuna og pahalipay sa opisyal nga isog nga nanalipod sa kaligdong sa industriya.

Sama sila kahilumon dihang kalit lang nga natangtang ang opisyal. Siya na hinuon ang nawagtang sa Sugbo samtang padayon nga nagwarawara sa kadalanan ang mga kolorum nga iyang nasakpan.

***

Ang kahilom sa taxi operators sa Sugbo naribalan lang sa kamingaw sa LTFRB. Way ek sa pekeng rehistrasyon sa kolorum nga mga taxi ni sa pagkalagpot sa opisyal nga nakabutyag sa binuang.

Hangtod nga nikumpisal ang pangu sa taxi operators sa Sugbo nga nakumbinser diay nila ang nasudnong mga opisyal sa LTFRB nga tugotan na lang ang kolorum nga mga taxi kay nakabuylo na sa ilang operasyon. Way bisan usang nahibung dihang nabisto human sa pila ka adlaw nga ang mga tag-iya sa 2,000 ka kolorum nga taxi units mao ra sang mga pangu sa kahugpongan sa taxi operators sa Sugbo.