Pahimus pa more!

Kay suspendido mang Uber, napugos ko og pamalihug og para og taxi. Human sa kapin sa oras nga pinaabot wa g'yuy bakanteng taxi nga nasagol sa nagkamang nga trapiko sa nasudnong highway sa amihanang Sugbo tungod sa akong gitrabahoan nga ABS-CBN Broadcast Complex sa Jagobiao, Mandaue City.

Nisuway ko sa Arcade City. Nga gihulagway nga alternatibo sa Uber. Bisan sa kusganong pasidaan sa Land Transportation Franchising and Regulatory Board (LTFRB) nga ilegal ang Arcade City, namasin ko kay wa may laing kasakyan sa dinalian ug mahinungdanon nakong lakaw.

Gipahibawo ko sa app sa Arcade City nga may pito ka sakyanan sa akong duol: Usa sa Mandaue, usa sa Liloan, usa sa Lapu-Lapu City, ug ang nahibilin sa Cebu City. Gipili nakong kinadul-an nga sakyanan. Gipahibawo ko sa ngan sa drayber ug sa matang sa iyang sakyanan.

Dihang gigamit nakong chat box ug gipangutana siya kon mamasahero ba, way tubag. Utrong way ek ang mas lagyong mga sakyanan. Nagduda ko nga sama nako nanguryuso ra sab sila sa app nga way seryusong tinguha sa pagsuway sa sistema. Nisamot ko og kamingaw sa kasayon ug kapaspas sa Uber.

Kay wa na may laing kapaingnan, nidangop na lang ko sa Grab. Nga dugay na nakong gilikayan kay nakumbinser ko nga mapahimuslanon ang ilang sistema tungod sa duha nako ka kasinatian: Gipatongan og P400 ang plitehan dihang nagpahatod ko sa bukirang barangay sa Busay; ug gibunalan ko og laing P400 dihang nagpahatod sa Talisay City.

Gawas pa, daghang nipasidaan nako nga nisimpatiya ang Grab sa natanggong nga mga pasahero human nasuspenso ang Uber pinaagi sa, nakatag-an ka, pag-doble sa ilang plitehan.

Di kaabot og P100 ang kasagarang plite paingon sa akong destinasyon. Kataposan nakong adto sakay sa Uber nakaplite ko og P95. Niadtong wa pa ko mo-boykot sa Grab, naka-plite ko og P97 sa samang destinasyon.

Maong nanguros na lang kong daan sa mas dakong plitehan nga ipahamtang sa Grab. Apan diriyot malimot sa akong kakulba dihang nipahibawo ang app nga lima ka gutlo ra ang gilay-on sa drayber gikan sa akong nahimutangan. Nahugno hinuon pagbalik sa pagkabantang sa ilang pangayuon nga plitehan: P147.