Siya ra ang makapamalikas
Gipakaingon nako nga matinud-anon si Presidente Rodrigo Duterte sa nahauna niyang panagana sa pagpanghilabot sa imbestigasyon sa Kongreso sa P6.4 bilyones nga shabu smuggling gikan sa China tungod sa kaikog nga iyang masapawan ang posibleng pagpasaka og mga kaso batok sa iyang mga tinudlo sa Bureau of Customs (BOC).
Para nako morang sablig sa bugnaw'ng tubig ang matag higayon nga ang presidente, nga gikabalak-an nga nagsugod na pagtukod og diktadura nga kinopya sa iyang idolo nga si Ferdinand Marcos, maghisgot sa panginahanglan sa pagtahud sa demokratikanhong mga institusyon sa nasud.
***
Apan ang bisan unsang ilusyon nga gitahud ni Duterte ang Kongreso isip buwag ug independente nga sanga sa gobyerno napapas tungod sa pagtambag sa iyang anak nga si Davao City Vice Mayor Paolo Duterte sa pagtambong sa imbestigasyon sa Senate Blue Ribbon Committee apan sa pagdumili sa pagtubag sa mga pangutana.
Ang tambag nga gipatabanan og tanyag sa tabang sa mga abogado giluwatan sab alang ni Atty. Mans Carpio, ang iyang umagad, ug sa uban pang resource persons nga dapiton sa Senado. Kansang gahom pagsagpa og contempt sa mga di motubag sa mga pangutana iyang gipahiyos.
***
Sa usa lang ka pamilok, ang institusyon nga iyang giulugulogan nga di niya hilabtan, bahala na sa ilang pagsalikway sa pipila ka sakop sa iyang gabinete, gihukasan niya sa usa sa labing mahinungdanong gahom: Ang paglusad og mga imbestigasyon aron pag-umol og mga balaudnon.
Di hinuon tang kapaabot sa mga senador, nga ang kasagaran mga alyado sa Malakanyang, nga motiyabaw sa pagbuno ni Duterte sa makasaysayanon nilang kaligdong ug kagawasnon.
***
Gihulagway ni Duterte nga nabarato na. Wa niya klaroha tungod ba sa insultohay nilang Senador Antonio Trillanes ug Senador Richard Gordon o tungod ba kay gisigehan og hisgot ang iyang anak ug umagad.
Kon mao, unsa may epekto sa hapit matag adlaw niyang pamalikas, panginsulto ug pagbugal-bugal ngadto sa labing taas nga buhatan sa gobyerno nga iyang giduma? Monopoliya na sab diay niya karon ang pagsukwahi matag karon ug unya sa labing batakang mga lagda sa maayong pamatasan nga gitudlo sa atong mga ginikanan? Siya na ba lang diay ang magbuot kinsay sakto ug kinsay sayop?