Pagdupa sa pangabuso

Nagkaabunda ang mga timaan nga ang pasalig ni Presidente Rodrigo Duterte nga tarungon pag-imbestigar ang sunud-sunod nga pagpamatay nilang Kian Loyd delos Santos ug ubang mga batan-on sa mga kamot sa kapolisan kutob ra sa sulti. Ug mahimong atik ra.

Mahimo gani nga pagarpar ra sab ang iyang saad ngadto sa mga tagtungod sa mga biktima nga siya ang mangunay pagtino nga masilotan ang mga responsable–mahimo gani nga siya gyud ang mangunay pagpusil patay nila–aron nga di na masubli ang bangis nga mga krimen batok sa inosente nga mga biktima.

***

Ang makapakugang nga paghigpit sa Philippine National Police (PNP) sa kasayuran nga makuha sa mga sakop sa media gikan sa ilang mga imbestigador bisan sa labing kasarangan nga mga kaso di maayong timaan alang sa liderato nga ni-garantiya nga wa nay mangabuso sa mga polis ug kon duna man mapahamtangan dayon sa tukma ug dinalian nga silot.

Kay unsa man ang dag-anan sa inosenteng mga biktima ug mga tagtungod kon ang mga imbestigador sa kapolisan ra ang magbuot unsa ra ang kasayuran nga ilang mahatag ngadto sa publiko pinaagi sa limitado ug depektuso nilang blotter entries ug press releases?

***

Bisan ang paglaslas sa mga kongresista sa budget sa Commission on Human Rights (CHR) alang sa sunod tuig di modason sa pasalig sa Malakanyang nga di nila tabonan ang mga polis nga mohakop sa balaod sa ilang mga kamot o manglaktod sa mga lagda sa kampanya batok sa kriminalidad ug ilegal nga drugas.

Gawas sa CHR, way laing ahensiya sa gobyerno nga nakapakita og determinasyon sa pagtino nga kahatagan og hustisya ang mga biktima sa extrajudicial killings.

***