Nabitay na sang suholan
Ang di maayong balita alang sa mga anak sa singot sa Sugbo ug Central Visayas mao nga mas niburot pa ang labaw sa minimum nga suholan sa mga mamumuo sa Metro Manila. Tungod sa labing uwahing uminto nga P21 matag adlaw, nisulbong nang ilang suholan ngadto sa P512 matag adlaw, labaw na og P146 sa nalansang nga suholan sa Metro Cebu nga P366.
Laing di maayong balita: Maglaway lang ang Sugbuanon nga mga mamumuo sa uminto. Kay, salamat sa dakong inhustisya sa sistema pagtakda sa suholan, di mahimong usbawan ang ilang suholan hangtod sa sunod tuig.
***
Mapatuman na ang mas dakong minimum nga suholan sa Metro Manila sugod sa sunod buwan, o 15 ka adlaw human sa pagmantala sa wage order sa Regional Tripartite Wages and Productivity Board (RTWPB) sa National Capital Region.
Apan ang mga mamumuo sa Sugbo, Bohol, Siquijor ug Negros Oriental kutob ra sa pangindahay. Di mahimong tandugon ang ilang suholan karong tuiga. Liwas pa sa Pebrero sa sunod tuig ang labing sayo nga panahon nga mahimong umintohan ang nabiya na pag-ayo nilang minimum nga suholan.
Tungod ni sa lagda sa RTWPB nga ka-umintohan lang ang minimum nga suholan kausa sa usa ka tuig. Salamat sa kalangayan sa RTWPB sa Central Visayas, Pebrero na karong tuiga natakda ang P13 nga uminto sa karaang P353 nga minimum nga suholan sa Metro Cebu.
Sa ato pa, sa Pebrero pa sunod tuig sila motuki sa sunod nga uminto, kon duna man. Ang katapolan sa RTWPB, labi nang mga representante sa mga negosyante nga di mag-apura sa usbaw sa suholan, maoy nakapabitay sa suholan sa mga anak sa singot dinhi sa ato.
Sama sa naandan, mapilde na sang sunod nga demanda sa uminto. Kay magkonsabo na sang mga representante sa mga kapitalista ug gobyerno pagluok sa mga anak sa singot.
Busa kon tinuod ang pangangkon nga nagpitik ang iyang kasingkasing alang sa mga kabos, angayng putlon ni Presidente Duterte ang eskandalo sa RTWPB pinaagi sa pagtangtang sa katungod sa pagbotar sa mga representante sa Department of Trade and Industry ug National Economic and Development Authority aron nga di sila makahigayon pagtila sa lapalapa sa mga negosyante.