Way makapaningil ni Duterte
Nagkinihaay silang Senador Richard Gordon ug Senador Antonio Trillanes tungod sa init nilang lalis atol sa usa sa mga hugna sa imbestigasyon sa Senate Blue Ribbon Committee sa P6.4 bilyones nga kontrabando gikan sa China. Sa kasong iyang gipasaka sa Senate Ethics Committee, gipasanginlan ni Gordon si Trillanes nga niluwat og mga pamahayag nga wa lang mopakauwaw niya kon dili nibuong gyod sa tibuok institusyon. Samang pasangil ang gisumbalik ni Trillanes batok ni Gordon. Ug may makahuloganon siyang pakapin: Kon nakalapas sila sa mga lagda, unsa may mahimo batok sa mas seryusong kalapasan ni Presidente Rodrigo Duterte? Ang pait nga kamatuoran mao nga wa tay mahimo batok sa inadlaw nga balikas, insulto ug pakauwaw ni Presidente Duterte. Di siya mapasakaan og bisan unsang kaso sa bisan asang korte tungod sa iyang presidential immunity.
Madutlan lang siya sa proseso sa impeachment. Apan di kaugpo ang bisan unsang impeachment complaint tungod sa makabungog niya nga mayoriya sa House of Representatives ug bisan sa Senado. Gani, laktod nga gibasura sa mga kongresista ang labing una nga impeachment complaint nga mapangahason nga gipasaka batok niya sayo karong tuiga. Pila ka semana ang nilabay, gipirmahan sab ni Presidente Duterte ang bag-ong balaod nga nipausbaw sa mga silot nga gipahamtang sa pipila ka probisyon sa Revised Penal Code. Apil nang krimen sa pagpakatap og sayop nga kasayuran.
Apil sa gipasanginlan nga nipakatap og fake news mao ang mga sinaligan ni Presidente Duterte sama nilang Presidential Communications Assistant Secretary Mocha Uson ug sa kadagkoan sa Philippine News Agency (PNA), ang opisyal nga news agency sa gobyerno.
Apan unsaon man pagsilot ang fake news ni Presidente Duterte? Apil nang pagdoble sa suholan sa mga polis ug mga sundawo, pagsulbad sa problema sa ilegal nga drugas sud lang sa tulo ka buwan ug pagdeklarar nga ilegal nang pagpabilin sa katungdanan ni Ombudsman Conchita Carpio Morales kansang termino iyang gipamugos nga napupos na niadtong 2015.
Ang pait nga kamatuoran mao nga way makapugong ni makapaningil ni Duterte bisan unsa pay iyang buhaton o isulti. Hangtod nga mapupos ang iyang termino. O hangtod nga mas sayo nga makaamgo ang kinabag-an sa katawhan.