Gahom sa pagpaubos

Ni-amen ug niyukbo niya ang hapit tanang gamhanang mga politiko ug adunahang mga negosyante. Kasagaran nila nangayo sa iyang tambag ug nisumbong sa ilang mga nalibgan. May pipila nga igo lang nangayo sa iyang pangaliya ug bendisyon.

Ang uban hinuon igo lang nisikit niya. Aron makapahulagway uban niya. Aron makapasigarbo nga suod sila sa simbahan. Uban ang wa kaayo matago nga panghinaot nga ang pagluhod atubangan sa prinsipe sa Simbahang Katoliko isipon nga simbolo sa ilang kamatinud-anon sa mga sugo sa Labaw'ng Makagagahom.

***

Apan nagpabilin nga yano siArsobispo Ricardo Kardinal Vidal. Ang upat ka dekada nga paghupot sa labing taas nga katungdanan sa labing dako nga artsidyosesis sa tibuok nasud wa maka-iban sa iyang kamapaubsanon.

Bisan sa katugbaw sa iyang nahimutangan, wa siyay hangin. Bisan sa kaabunda sa mga ulog-ulog, wa moburot ang iyang ulo. Bisan sa kasuod sa mga labing hawod, wa siya mahubog sa gahom. Bisan gihangad nga sinugo sa Ginoo, nagpabilin nga nagtugkad ang iyang mga tiil sa yuta.

***

Apan gipasabot ni Cotabato Archbishop Orlando Cardinal Quevedo nga ang kayano ni Vidal wa magpasabot sa iyang kainutil: "Yano siya, dali nga duolon, takos nga maminaw sa managlahi nga mga panahom, mainampingon sa pagtuki sa

politikanhong mga isyu, apan isog sa pagpanalipod sa baruganan sa simbahan."

Gipasabot ni Cebu City Mayor Tommy Osmeña ang gahom ni Vidal: "Di siya dominante nga lider. Di siya mamugos nimo. Hilom ang iyang paagi pagduso sa iyang mga kawsa."

***

Napasundayag ni Kardinal Vidal ang talagsaong gahom sa iyang kamapaubsanon atol sa piniliay sa kahugpongan sa homeowners sa subdivision nga iyang gipuy-an human ni-retiro isip Arsobispo sa Sugbo. Nihangyo siya nga mobotar pinaagi sa proxy. Apan gibalibaran kay nilapas na sa gitakda nga panahon sa pagpangolekta sa proxy votes.

Sa way pakiglalis ni bisan kinsa, ni sa pagpangita og koneksiyon nga makasabot sa iyang hangyo, nitambong si Kardinal Vidal sa tigom sa homeowners ug mapailubon nga nagpaabot sa iyang turno sa pagbotar. Kay naglisod na man paglakaw, niabot siya nga nagsakay sa iyang wheelchair. Nanlipaghong sa kauwaw ang mga tigpasiugda. Ug naglumba sa pag-amen, pagyukbo, ug pagpangayo og pasaylo niya.