Maghiusa inay mag-unay
Di gyud unta angay nga mag-unay ang mga pasahero ug ang mga drayber sa mga sakyanan nga pamasahero. Kay ang pipila ka butang nga ilang gikasungian matabonan sa mas daghan nga kahigayonan nga managsama ang ilang nahimutangan.
Ang kinabag-an sa mga pasahero ug mga drayber managsama nga gagmay og kita, managsama nga gipahamtangan sa nagsige og taas nga presyo sa mga palaliton, managsama sab nga biktima sa kahakog ug panagkonsabo sa higante nga mga kompaniya sa lana ug managsama nga nabawo sa kainutil sa gobyerno pagpanalipod sa ilang mga interes.
***
Apan ang gobyerno naghimo og mga lakang sa pagbuwang sa mga pasahero ug mga drayber sa mga sakyanan nga pamasahero. Tingali aron mahuyang ang managsama nila nga kawsa. Aron nga di magkahiusa sa pag-awhag nga bungkagon ang bangis nga cartel sa lana ug himuon nga mas makiangayon ang mga lagda sa publiko nga transportasyon.
Pananglitan, gibuwang sa LTFRB ang mga pasahero ug PUJ drivers pinaagi sa pagtuyo og bungkig sa minimum nga plitehan. Kon mahigot ang mga pasahero ug mga drayber sa lalis sa sensiyo, wa na silay mahibilin nga umoy sa pagtuki sa mas dagko nga mga pakigbisog.
***
Laing maniobra sa pagbuwang maong pagpalapad sa LTFRB sa 20% nga diskuwento sa plitehan sa mga tinun-an bisan sa mga adlaw nga way klase. Uyon ko nga hatagan og diskuwento ang mga tinun-an apan supak ko nga ang mga drayber maoy silotan.
Dakong inhustisya nga samtang ang mga negosyante makabawi sa 20% nga diskuwento nga ilang gihatag sa senior citizens ug persons with disabilities pinaagi sa tax rebates sa BIR, ang kabos nga mga drayber way kapasahan.
***
Nagpapogi ang gobyerno pinaagi sa LTFRB sa pagpangisog sa diskuwento sa plitehan apan ang benepisyo di gikan sa nasudnong panudlanan, nga maoy gikuhaan sa mga diskuwento sa mga botika, kan-anan ug ubang bay patigayon alang sa senior citizens ug PWDs, kon dili gikan sa apiki nang daan nga kita sa mga drayber.
Mao nga aron di molampos ang mga puwersa sa pagbuwang ang mga pasahero ug mga drayber angay’ng mohunong na sa wa kinahanglana nila nga away. Hinunoa, maghiusa paghaw-as gikan sa lawom nga gahong nga managsama nilang nalubngan.