Panamilit sa haya
Sa bisperas sa paglubong sa patay’ng lawas ni Ricardo Kardinal Vidal, naglikus-likos ang linya sa katawhan sa dakong hawan sud sa compound sa Cebu Metropolitan Cathedral ug sa kadalanan nga naglibot sa simbahan, nga mao’y iyang pinuy-anan sa pagsugod pag-alagad sa artsidyosesis 37 ka tuig ang nilabay ug sa iyang patay’ng lawas sa niaging walo ka adlaw.
Dayong tungang gabii, kanus-a gitakdang tak-opan
nang simbahan aron pagpangandam sa iyang lubong, niabot na ang tumoy sa linya sa katawhan sa dan Colon. Kalapad sa pabawong gugma ug pasidungog sa iyang pagtaliwan.
* * *
Mao nga labihang dakoa sa akong problema. Giusikan nako ang daghang kahigayonan pagtan-aw sa iyang haya, sa unang mga takna niya sa Cathedral ug sa pagbalhin niya sa San Pedro Calungsod Shrine. Nagdako lang ang hunahuna nga mangadlawon aron di makapasamot sa kahuot sa simbahan.
Salamat sa pagsige og unya-unya, naapil ko sa kaliboan nga nagkara-kara sa pag-apas sa kataposang mga takna sa iyang haya. Wa koy pailob nga molinya. Apan mauwaw sab ko nga mosal-ot. Maayo na lang nga giingnan ko sa barangay tanod nga mahimo ra kong mosud pagtambong sa misa.
***
Maayo na lang nga nagkita mi ni Klasmit Yul Julia. Gikuyogan ko niya pag-adto sa kumbento latas sa higanteng lumbay sa nagbuntaog nga mga korona sa buwak. Nakadayeg mi sa kapaspas sa kaparian ug mga layko pagbahin sa kaliboan ug usa ka gimbuhaton pagduma sa haya ug lubong.
Nagsud-gawas ang mga pari, mga madre, mga negosyante, mga politico, ug kasarangang mga molupyo nga nagda og mga pagkaon, mga sangkap sa choir ug mga ostiyas sa kalawat, nagpasud og mga sakyanan ug nagpasidaan nga may sakop sa gabinete nga umaabot. Way kinutoban ang kutay sa ilang pagtinabangay.
* * *
Nakabantay sa akong problema si Klasmit Yul, nga nabantog nga nakatambong sa hapit tanang haya sa Dakbayan sa Talisay.
Gipasunod ko niya paingon sa mga bintana lapas sa dagkotanan sa kandila nga tungod diay sa altar sa simbahan.
Labihang bantanga sa haya. Mas duol kay sa cordon sa sud nga nagpugong sa naglinya nga katawhan. Tagsa ra ming nagkita apan sa matag higayon nigasa og pangaliya. Maong bisan uwahi na, daghang salamat, Kardinal Vidal!