Ahat nga sulbad sa kaso
Duna'y problema ang kapolisan. Mahimo nga ahat pa ang ilang pagdeklarar nga nasulbad na ang kaso sa pagpatay ni Police Officer 1 Mae Sasing. Kinsa gibanhigan ug gipusil patay sa Basak, Mandaue City, samtang nagsakay sa iyang motorsiklo gikan sa iyang trabaho sa Lapu-Lapu City Police Office paingon sa iyang pinuy-anan sa Jugan, Consolacion.
Ang ilang gipasanginlan nga mamumuno, si Felix Taytayan, may lig-on nga panalipod sa iyang kaugalingon: Naghakot siya og mga kargamento sa barko dihang nahitabo ang pagpamanhig. Niinsistir ang iyang kaubanan nga tripulante nga kauban nila si Taytayan sa tibuok gabii niadtong Oktubre 31.
***
Ang kapitan sa MV Gemini 10 nga si Ariel Mancio nitugan sa dyAB Radyo Patrol nga kuyog si Taytayan sa ilang biyahe gikan ug paingon sa Madridejos sa Bantayan Island ug Dakbayan sa Sugbo sud sa tulo ka adlaw gikan sa Oktubre 30 hangtod sa Nobyembre 1.
Matod ni Mancio nisakay si Taytayan sa iyang barko isip kargador sa ilang biyahe gikan sa Madridejos niadtong Lunes sa gabii, Oktubre 30, hangtod sa ilang pagdunggo sa pantalan sa Dakbayan sa Sugbo sa alas-4 sa kadlawon niadtong Martes, Oktubre 31. Nagpabilin si Taytayan pagpangalsa sa mga kargamento sa barko sa tibuok adlaw hangtod sa ilang paglawig balik sa Madridejos pagka-gabii sa Oktubre 31 ug sa ilang pagdunggo sa Madridejos sa kadlawon sa Nobyembre 1.
***
Laing tripulante sa MV Gemini 10 nga si Angelo Vilches nipahibawo sa dyAB Radyo Patrol nga nagpaingon na sila sa Madridejos dihang nabasahan ni Taytayan sa Facebook sa iyang telepono ang nahitabo ni Sasing.
Masulub-on nga nipahibawo niya si Taytayan nga classmate silang Sasing. Apan wa maghisgot si Taytayan may relasyon ba sila. Nitug-an si Vilches nga may hinigugma si Taytayan nga taga-Consolacion sab, apan di si Sasing, nga niduaw nila sa barko nga nagda og pagkaon.
***
Gidakop sa kapolisan si Taytayan sa ilang bay sa Kaongkod, Madridejos, niadtong Nobyembre 3, Biyernes. Pagka Sabado, Nobyembre 4, may mga polis nga nakighinabi ni Mancio.
Apan bisan sa pag-insistir ni Mancio nga wa mabuwag si Taytayan gikan nila sa gabii sa krimen, gipasaka sa kapolisan ang kasong pagpatay niadtong Lunes, Nobyembre 6. Atong susihon makabarug bang kaso sa piskaliya.