Pagbalik sa tangan-tangan
Way aktuwal nga hulga ang mga terorista paggubot sa Piyesta Senyor sa Dakbayan sa Sugbo duha ka buwan gikan karon. Igo lang nangagpas si Cebu City Mayor Tommy Osmeña nga mahimong manimawos ang Maute Group human sila napilde sa lima ka buwan nga gubat sa Marawi City.
May sukaranan ang iyang kabalaka. Kay madanihon man nga target sa mga terorista ang higante nga mga tapok sa katawhan atol sa solemne nga prosesyon sa bisperas ug sa Sinulog Grand Parade sa adlaw sa piyesta. Apan mas dako ang kadaot nga mamugna sa iyang panagang.
***
Ang pagpawong sa cell sites unya sa Enero 20 ug 21, 2018 mahimo nga makabadlong sa mga terorista sa pagpaulbo sa mga bomba pinaagi sa cellular phones. Apan di makapugong sa determinado nga plano sa terorismo.
Mas epektibo nga panagang ang hugot nga pagbantay. Di lang sa kapolisan, militar ug ubang puwersa sa gobyerno kon dili labi na sa ordinaryo nga katawhan nga mas takos nga makakita sa bisan unsang hulga. Ug katabangan ang ilang pagbantay kon palambuon inay pawngon ang signal sa higante nga mga kompaniya sa telepono.
***
Nikumpisal na ang kapolisan ug ang militar nga sila ang labing mainutil kon pawngon ang cell sites atol sa Piyesta Senyor:
Una, kay pipila na lang ang ilang radyo busa maglisod sila sa pagpakatap sa ilang mga sakop, mga sakyanan ug ubang kahimanan ug sa pagtubag sa bisan unsa nga alarma; ug
Ikaduha, gawas nga nihit managlahi pa gyod ang frequency sa mga radyo sa militar ug kapolisan busa maglisod sila sa pagsaw-anay sa dinalian nilang kasayuran.
***
Mas dako ang kadaot nga mahiagoman sa kinabag-an sa katawhan. Kansang panginabuhi ug patigayon nagsandig sa komunikasyon pinaagi sa cell sites. Sa way paghisgot sa pagsulbong sa hulga sa kamatayon sa mga pasyente nga may seryusong balatian ug mga biktima sa mga emerhensiya.
Ang plano ni Osmeña sama ra sa pag-awhag nga mobalik ta sa tangan-tangan aron di masabotahe sa mga terorista ang atong mga linya sa kuryente. Kon mahinayon, seguro nga modaog ang mga terorista. Bisan wa pa katanom og bisan unsa nga bomba, mainutil ug maputos na sa kahadlok ang katawhan.