Paghuwat sa bag-ong telco
Nakugang ang usa ka tigpaminaw sa DYAB Abante Pa, Bisaya nga labihang paspasa sa iyang pag-download og dako nga video file niadtong Lunes sa hapon. Nahuman na sud lang sa 10 ka gutlo nga kasagaran maabtan man unta og pila ka oras.
Kay usa man sa nagsige og bagulbol sa nagkamang nga internet sa Sugbo, wa siya maanad sa talagsaon nga kapaspas sa iyang koneksiyon. Human sa pipila ka gutlo, nadunggan niya ang among balita nga gitanyagan ni Presidente Rodrigo Duterte ang China nga mahimong ikatulo nga kompaniya sa telekomunikasyon sa Pilipinas.
***
Natsambahan ba lang ang pagsulbong sa internet speed? O naatlan lang nga way laing naggamit? O natay-og dayon ang Globe Telecom ug Philippine Long Distance Telephone (PLDT) Inc. sa pahibawo sa Malakanyang?
Samtang motumaw ang mga kabalaka sa kahigayonan nga manglili sila sa atong mga text ug tawag sa telepono, way lalis nga ang dakong gahom ug puhonan sa China mao ang makabungkag sa pagdominar sa duha ka higante nga telco nga sud sa dugay na uyamot nga katuigan nakatumpi og ginansiya ug nipaantos sa ilang mga konsumidor.
***
Dugay na nga nangandoy ang mga konsumidor nga dunay motumaw nga lig-on nga kumpetinsiya nga makahagit sa kahawod sa Globe ug PLDT. Kumbinsido sila nga tinuoray lang nga kumpetinsiya ang makapugos sa duha ka higante sa pagpalambo sa kalidad sa ilang serbisyo ug paglaslas sa makalilisang nila nga ginansiya.
Nabawo sila sa napakyas nga pagsud unta ni Ramon Ang pinaagi sa iyang Liberty Telecoms Holdings ug gipul-an na og pinaabot kanus-a makabuylo si kanhi Senador Manny Villar ug ang iyang Streamtech Systems Technologies nga mao pay pagpangaplay og prangkisa sa Kongreso aron mahimong telco.
***
Human sa tigom nilang Presidente Duterte ug Primero Ministro Li Keqiang sa China sa niaging semana, nabaniog dayon ang kahigayonan nga mas una nga mahimong telco ang Philippine Telegraph & Telephone Corp. (PT&T) nga gipanagiya nila ni Salvador Zamora II ug Benjamin Bitanga.
Ilang alas? Nakabubo na og puhonan sa PT&T ang China Telecom, usa sa labing dako nga telco sa China. Nga, ubos sa mga lagda, makapanag-iya og hangtod 40% sa bag-ong telco sa Pilipinas, kon mahinayon.