Braso sa Team Rama
Si anhing Barangay Kapitan Imok Rupinta sa Ermita sa Dakbayan sa Sugbo giisip ni kanhi Cebu City Mayor Mike Rama nga mao ang braso sa ilang grupo nga Barug Team Rama. Siya ang ilang gitahasan nga mopuli sa namatay nga si Barangay Kapitan George Rama.
Wa hinuon dayon makaandam si Rupinta sa pagkamatay ni Kapitan Rama dul-an sa tulo ka tuig na ang nilabay. Matod ni Mayor Rama napugos siya og pangisog batok ni Mayor Tommy Osmeña ug uban nilang kaatbang aron pagtapak sa dakong haw-ang nga namugna sa pagtaliwan sa iyang ig-agaw.
***
Kay ang matag politikanhon nga partido nagkinahanglan og braso. Gawas sa popularidad sa iyang mga piliunon ug makinarya sa kampanya, nagkinahanglan ang partido og isog nga mga haligi nga di mokakak sa mga panghudlat sa mga kaatbang ug andam sang manghudlat o mogamit g'yud og aktuwal nga puwersa.
Nga mao ang papel ni Kapitan Rama sa BOPK dihang alyado pa sila ni Mayor Osmeña ug sa Team Rama dihang nag-oposisyon na si Mayor Rama. Matod ni Mayor Rama takos si Rupinta nga nahimong braso sa ilang grupo.
***
Mao diay to nga wa g'yud mokakak si Rupinta sa daghan uyamot nila nga engkuwentro ni Mayor Osmeña sa Carbon ug sa Ermita. Bisan nasuspenso silang Rupinta ug tanang konsehal niadtong Pebrero wa makatarug si Osmeña sa hugot nga pagkontrolar ni Rupinta sa iyang teritoryo.
Pagbalik ni Rupinta sa puwesto niadtong Agosto ug bisan sa mga pasidaan ni Osmeña, gidid-an dayon niya ang mga naninda og isda ug gibanhaw ang pagpangolekta og bayad sa mga mamaligyaay.
***
Sa kataposan nilang panagsungi, nga niulbo dihang gipaguba ni Osmeña ang outposts sa mga tanod sa Ermita sud sa merkado sa Carbon, nisaad si Rupinta pag-adto sa buhatan sa mayor aron ipasabot ang kapuslanan sa outposts. Apan wa siya motunga. Matod ni Mayor Rama siya ang nipugong ni Rupinta. Kinsa iyang gipasabot nga di maminaw si Osmeña niya ug mahimo gani nga binabuyon siya og kasaba atubangan sa media.
Karon nga wa na si Rupinta niingon si Rama nga siya na sab ang mangisog. Hangtod nga may ikahulip nga bag-ong braso sa ilang grupo.