Pagkahilis ni Vinta
Kon may paagi sa pagtingob og paminaw sa pagginhawa og luag sa mga molupyo sa Mindanao ug Kabisay-an, nga nagpadayon pa paghipos sa mga patay'ng lawas, pagtambal sa mga naangol ug pag-ayo sa nagguba nga kabalayan tungod sa kabangis ni Urduja ug nabalaka na sab sa gipasidaan nga mas kusog nga bagyong Vinta, masukod ang labing lanog nga pasalamat.
Diha nga gipahibawo sa Philippine Atmospheric, Geophysical and Astronomical Services Administration (PAGASA) sa alas-8 gahapon sa buntag nga ang bagyo nga nagdangadanga sa nasud nihinay ug nahimo nga Low Pressure Area (LPA).
Ang kakatag sa panganod ug ang kainit sa Pacific Ocean mao ang nakapalisod sa pagtakda sa agianan ug sa sunod nga mahitabo sa kanhi bagyo. Paspas unta nga nagpaduol sa silangan nga Mindanao sa niagi nga mga adlaw apan niungot tungod sa puwersa ni Urduja.
Human gibanabana nga mas kusog pa ni Urduja, nga ang pag-unos gikabalak-an gani nga moabot og 160 ka kilometro matag oras, ug nga posible nga moigo sa Sugbo dayong Pasko, ang tapok sa daotan nga panahon nagkatibuwaag apan wa hingpit nga mabungkag.
Apan bisan ang LPA di kakumpiyansahan. Gawas nga mahimo nga mokusog og balik ug mahimo na sab nga bagyo nga Vinta, mobubo gihapon og daghan nga uwan ug lahi sa mga bagyo nga mas hinay nga moirog.
Sa ato pa, ang LPA makapatuyang og pabuhagay sa bawon niya nga uwan sa mga dapit nga maagian. O maungotan. Kay kon langayan si Urduja, nga niirog lang og unom ka kilometro matag oras, mas hinay pa g'yud ang irog sa LPA.
Hinaot nga magpabilin siya nga LPA sa pagsud sa Philippine Area of Responsibility (PAR) karong Miyerkules hangtod sa pagsaka paingon dinhi sa Sugbo ug Kabisay-an karong Disyembre 23. Mas maayo gani nga mosimang sa dagat ug di moigo sa bisan asa nga yuta o mahilis na lang.
Sa makadaghan na nga higayon napamatud-an ang katalagsaon sa gahom sa mga pangaliya bisan batok sa labing bangis nga puwersa sa kinaiyahan. Ug Pasko ang labing bililhon nga kasaulogan sa sumad sa pagpakatawo sa Manunubos. Hinaot nga makalihay ang adlaw sa Pasko sa lisod tugkaron nga mga pagsuway.