Panglaktod ug pagmaniobra
Nikumpisal na ang mga naghimo sa 1987 Constitution ngano nga wa maklaro kon maghiusa o magbuwag ba ang botasyon sa Senado ug sa House of Representatives sa pag-usab sa batakang balaod nga mao'y pabilo sa panagsungi sa mga sakop sa duha ka bay balaoranan:
Kay giumol nila ang probisyon uban ang pagtuo nga usa ra ka bay balaoranan ang ilang tukuron; apan dihang gituki na ang mga probisyon sa Kongreso nahukman nila ang pagtukod sa House ug sa Senado ug nakalimtan na ang pag-usab sa nahauna nga probisyon pag-usab sa konstitusyon.
***
Wa katabang sa kapakyas pagkamatikod sa kasaypanan ang talagsaon nga popularidad ni anhing Presidente Cory Aquino nga mao ang nagtukod sa Constitutional Commission (Con-Com) sa 1986 ug nagtudlo sa 48 ka sakop nga gipangulohan ni anhing chief justice Cecilia Munoz-Palma nga nipanday sa batakang balaod.
Nga mahimong masubli ning nag-ung-ong nga pag-usab sa 31 ka tuig na nga konstitusyon. Ang talagsaon nga popularidad ni Presidente Rodrigo Duterte mahimo nga mopalusot sa bisan unsa nga kausaban sa konstitusyon nga ilang isugyot, sa wa'y makiangayon nga pagtuki makaayo ba sa nasud ug katawhan.
***
Ang kasaypanan sa Con-Com sa 1986 di hinuon magamit nga lisensiya sa mga kongresista sa paghimo og bisan unsa na lang nga hubad. Kay abunda ang ubang mga probisyon sa 1987 Constitution nga nagtakda nga buwag ang botasyon sa House ug sa Senado sa kasarangan nga mga balaudnon. Dakong salikwaot kon lamyon sa House ang Senado sa pagtuki na sa batakang balaod.
Nahibawo na ang mga alyado ni Presidente Duterte nga ipatigbabaw sa Korte Suprema ang buwag nga botasyon. Ganahan lang g'yud sila nga mosuway sa paglusot.
***
Di mahimo nga tanang katawhan ang moapil sa pag-usab sa konstitusyon. Mao nga kinahanglan g'yud unta sila og mga representante nga pilion alang lang g'yud sa makuti nga tahas sa pag-usab sa konstitusyon, di ang mga senador ug mga kongresista nga napili alang sa mas kasarangan nga katuyoan.
Mas pait kon ang mga niinsistir sa pagkuha sa gahom pag-usab sa batakang balaod wa maghunahuna sa kaayuhan sa nasud ug sa katawhan. Hinunoa naghigwaos sa paglugway sa ilang mga termino ug pagpaburot sa pribado nila nga mga interes.