Sabotahe sa bugas
Gawas nga gipasanginlan nga namakak sa tinuoray nga suplay sa bugas humay sa ilang mga bodega, gidudahan na sab karon ang kadagkoan sa National Food Authority (NFA) nga nisabotahe sa ilang kaugalingong imbentaryo. Nitumaw ang mga timaan nga nagdumili ang NFA sa pagpamalit sa lokal nga bugas humay nga bunga sa abundang ani sa niaging tuig nga nisangpot sa pagtidlom sa ilang pundong bugas.
Ang katuyoan? Aron mapugos ang pamunoan ni Presidente Rodrigo Duterte sa pagtugot sa dinalian nga pagpangompra og dugang bugas humay gikan sa ubang kanasuran.
Nahaunang lusot sa NFA sa pagtibugsok sa ilang imbentaryo mao ang giingon nilang kanihit sa ani sa mga mag-uuma sa nasud sa niaging tuig. Apan niinsistir si Agriculture Secretary Manny Piñol nga ang ani sa niaging tuig mao ang labing taas sa nangaging katuigan.
Mao'ng nidalidali pag-usab ang NFA sa ilang katin-awan: Wa diay silang kapalit og igo nga lokal nga bugas humay kay nipili ang mga mag-uuma sa pagbaligya sa ilang ani ngadto sa pribadong mga negosyante nga nitanyag og mas dakong presyo kay sa buying price sa NFA nga P17 matag kilo sa tipasi.
Apan nabuko na sab ang NFA. Gibutyag ni Piñol nga may nahibilin pa nga daghang tipasi sa nagkalain-laing umahan sa nasud nga gitanyag sa mga mag-uuma sa tag-P17 ang kilo. Gipahibawo sab sa Samahang Industriya ng Agrikultura (Sinag) nga tag-P17 matag kilo ra ang mga tipasi sa Mindoro.
Nganong inay gastuhon ang ilang pundo sa pagtabang sa lokal nga mga mag-uuma pinaagi sa pagkompra sa mga tipasi sa ilang naandan nga buying price nga tag-P17 matag kilo, moinsistir man ang NFA sa pagpangompra og bugas humay gikan sa ubang kanasuran?
Posibleng katin-awan mao ang pagkawani sa kadagkoan sa NFA sa importasyon sa 325,000 ka tonelada nga bugas humay nga moabot na karong buwana kay gitugyan sa NFA Council ngadto sa pribadong mga negosyante.
Karon gibanhaw sa kampo ni NFA-Administrator Jason Aquino ang ilang kampanya sa mas laktod nga direktang pag-import sa gobyerno og bugas humay. Nga napamatud-an nang nisamot pagpaburot di lang sa utang sa NFA kon dili hasta na sa bolsa sa mga mapahimuslanon.