Akong dako’ng sala

Gisukmatan ko sa mga haligi sa Archbishop Teofilo Divine Mercy Communities (nagsige ko og pasalig sa akong kaugalingon nga nagkomedya lang sila) sa kadaghan sa mga nanambong sa healing session (nga ilang ginganlan og Apostolado) sa Dakbayan sa Sugbo sa niaging Sabado tungod sa akong pagsibya sa kalihokan, sukwahi sa ilang hangyo.

Kay napilo og hangtod kaupat ang mga nanambong kay sa naandan nilang tapok, namauli ang uban nga wa mahilot kay nawad-an og paglaom nga maabtan pa sila tungod sa kakuwang sa panahon. Nipasalig ang mga tigpasiugda nga mangita sila og paagi kon magpadayon ang pagdaghan sa katawhan.

***

Mao'ng nahinangop ko dihang gipabasa sa akong asawa sa ebanghelyo pagka sunod adlaw mahitungod sa pagdagsa sa labihan kadaghan sa mga masakiton nga nagpatambal sa bisan asang dapit nga ilang naabtan si Hesukristo. Wa sila maato og tambal apan ang tanang nakakupot sa iyang kapa nangaayo.

Ako dayong gi-text ang mga tigpasiugda mahitungod sa ebanghelyo: "Di ba kaha ni mao'y sulbad sa nitumaw nga suliran?" Wa sila motubag. Nabalaka ko nga di diay tingali komedya ang ilang pagsukmat nako.

***

Human sa pila ka adlaw, gipabasa ko sa akong asawa sa laing ebanghelyo mahitungod sa buwag nga pag-ayo ni Hesukristo sa usa ka amang ug usa ka buta uban ang awhag nga di sila magsaba sa uban. Inay motuman, gisangyaw hinuon nila ang milagro.

Gipangutana ko sa akong asawa (ganahan ko'ng motuo nga nanungog lang siya) kon wa ba ko maigo sa ebanghelyo. Nipatin-aw ko nga giawhag tang tanan sa pagsangyaw sa maayong balita. Apan sa tago nahinuklog nga tingali sayop ang akong pagsabasaba.

Wa'y tinguha si Hesukristo paglilong sa iyang mga milagro. Apan tingali nabalaka nga kon isangyaw ang iyang binuhatan magdasok pag-ayo ang katawhan ug mosangpot sa kayagaw. Labaw sa tanan, mahimo'ng matabonan ang tinuod niya'ng mensahe. Inay patalinghugan ang iyang mga pagtulon-an, isipon hinuon siya nga madyikero ug tigpasiugda sa labing talagsaon nga mananambal sa tanang balatian.

Mao nga kinasingkasing, ug uban ang hingpit nga paghinulsol, ko'ng mangayo og pasaylo sa Archbishop Teofilo Divine Mercy Communities. Motak-om na ko ug igo na lang motabang, bisan di takos, pagsangyaw sa maayo nila'ng mga pagtulon-an.