Pangaliya, tabang ug puasa
Sa iyang pag-awhag sa mga Kristohanon sa paghatag og higayon sa gahom sa kahilom ‘ning panahon sa Kuwaresma nga pormal nga giablihan sa Miyerkules Badlis, ug sa paghunong sa pag-apil sa way kinutoban nga lumba sa kiat ug kilas nga bag-ong mga teknolohiya sa bag-ong panahon, si Pope Francis ni-detalye sa labing yano niyang mga giya sa labing tukma nga pagtimaan sa bililhon nga 40 ka adlaw sa kalendaryo sa simbahan.
Gipalawoman niya ang kahulogan sa tulo ka naandan nga mga gimbuhaton sa Kuwaresma nga igo ra natong gisumay-sumay sukad pa sa atong katiguwangan: Pagpangaliya, pagtabang sa mga nagkinahanglan ug pag-puasa. Ania ang kabahin sa iyang wali:
* * *
“Ang paghatag og limos makapalingkawas nato gikan sa kahakog ug makatabang nato sa pag-ila sa atong mga silingan nga atong mga igsuon. Bisan unsa ang akong gipanag-iya di ako lang. Kanindot unta kon ang paglimos mamahimong tinuod nga kabahin sa kinabuhi sa matag usa nato!
“Gusto ko nga molaom nga, bisan sa inadlaw natong tagbo sa mga nagpakilimos, atong makita ang ilang mga hangyo nga gikan sa Ginoo mismo. Sa atong paglimos, atong gipakisaw-an ang mga grasya sa Ginoo alang sa iyang matag anak. Kon pinaagi nako ang Ginoo makatabang og tawo karong adlawa, di ba diay siya mohatag ugma alang sa akong mga panginahanglan? Kay way mas manggihatagon pa kay sa Ginoo.”
* * *