Pagkiyugpos ug pagtak-om
Naigo ko sa wali sa dakong opisyal sa Catholic Bishops Conference of the Philippines (CBCP) niadtong Miyerkules Badlis nga usa sa labing dakong krimen nga nahimo sa katawhan sa atong panahon mao ang pagpakahilom. Inay mopadayag og pagsupak sa di maayo nga mga panghitabo, o bisan pagpadayag na lang sa atong baruganan sa mga panghitabo sa atong palibot, gipili nato ang pagtak-om.
Inay magpakabana, gipili nato ang pagpangiyugpos. Gikumbinser nato ang atong kaugalingon nga pinaagi sa di pagpanginlabot atong nalikayan ang dugang lalis. Apan dakong sala ang wa paghimo sa angay’ng himuon.
* * *
* * *
Di na kong kahinumdom sa kataposang higayon nga gipalawoman g’yud nako paghisgot ang extrajudicial killings. Tingali tungod sa kamingaw sa reaksiyon sa publiko, o sa padayong pagpanglaktod sa balaod sa mga polis ug vigilantes, o sa organisadong kampanya pagpakauwaw ug pagpanghudlat sa tanang mokuwestiyon sa kabangis sa gubat batok sa ilegal nga drugas, gipili nako ang ubang mga kontrobersiya nga mas makapangisog sa akong baruganan.
Mao nga sa sunudsunod nga mga patay, igo rang gituki ang nabutyag nga mga detalye sa mga operasyon sa kapolisan. Sa way pagsubay sa tinuoray nga tinubdan sa kapintas nga mao ang kinatas-ang ang-ang sa kagamhanan.
* * *