Mga lagda sa milagro
Dihang gipahibawo sa kahibulongan nga pagkaayo sa nagkadaghan nga mga masakiton nga nidangop ni Sir Julius Poloyapoy, nagduda ang pari nga lain na sab 'ning kaso sa pagpangilad. Mao'ng gipatawag niya ang pito ka pasyente nga labing grabe og sakit nga giingong nangaayo. Gipasubli sa iyang kailang mga doktor ang tanang dokumento sa ilang pagkasakit, pagpatambal sa mga eksperto ug pagkawa sa tanang timaan sa ilang sakit human nahilog ni Sir Julius.
Nakumbinser siya sa talagsaong gasa ni Sir Julius. Mao nga siya na karon ang nitabang sa bantogang mananambal aron nga makaabot sa mas daghang dapit ug makahilog sa labing daghang pasyente.
Mas higpit ang mga lagda nga gihuptan sa Lourdes Medical Bureau sa Lourdes, France, nga mao'y tigsubli sa milagrusong pagkaayo sa mga sakit sa shrine sa Our Lady of Lourdes:
•Ang orihinal nga diagnosis kinahanglan nga matino nga wayduda;
•Ang sakit kinahanglan nga way kaayuhan bisan sa mga tambal;
•Ang pagkaayo kinahanglan nga nahitabo atol sa pagduaw sa Lourdes shrine;
•Ang pagkaayo kinahanglan nga diha-diha, hingpit ug permanente.
Mas higpit pa g'yud ang mga lagda nga gipahamtang ni Pope Francis sa pag-ila sa mga milagro nga gikinahanglan alang sa beatification ug canonization. Ang bag-ong mga lagda nga gipatuman sukad niadtong 2016 mao nay moduma sa kawsa sa pagka santo ni Arsobispo Teofilo Camomot.
Gitakda niya nga ang panel sa mga eksperto sa medisina kinahanglang may quorum nga unom (sa pito ka sakop) ug ? nga mayoriya ang maka-deklarar og milagro (sa karaang lagda, yano nga mayoriya lang sa mga sakop nga nanambong). Kini aron pagtino nga mas sihag ug may sukaranan sa siyensiya ang mga deklarasyon. Kon isalikway sa panel ang pangangkon sa milagro, makaapelar ang postulator, ang nagduma sa kawsa sa pagka Santo o Santa. Itudlo ang bag-ong mga sakop sa panel.Ang mga eksperto di ipaila sa postulator.Ang pangangkon sa milagro di masubli og labaw sa tulo ka higayon.
Ang pangangkon sa milagro unahon pagsubli sa duha ka eksperto sa artsidyosesis. Ang ilang rekomendasyon ipada sa panel sa Vatican. Suweldohan ang mga eksperto apan pinaagi lang sa wire transfer, sukwahi sa karaang lagda nga mahimong cash.