Eksperto sa PAO
Usa sa gipasidungog ni Dr. Erwin Erfe, ang kontrobersiyal nga medicolegal officer sa Public Attorney’s Office (PAO), mao nga sakop siya sa American College of Forensic Examiners Institute (ACFEI). Gani gihulagway g’yud ni Erfe ang iyang kaugalingon nga “Fellow” ug “Certified Forensic Physician” sa ACFEI.
Apan gisukwahi ang iyang pangangkon sa labing menos tulo ka ahensiya sa gobyerno. Ang Malakanyang, Department of Justice (DOJ) ug Department of Health (DOH) pulos nideklarar niya nga di “pathology expert” ug busa ang iyang paghulagway sa mga nabakunahan sa Dengvaxia di angay’ng isipon nga “expert opinion.”
* * *
Mas makaila tingali kita ni Erfe kon ato unang subayon unsa ang ACFEI, ang kalibotanong institusyon nga iyang gipasigarbo. Ang ACFEI nangangkon nga eksperto sila sa 11 ka specialties, labing dako nga certification organization sa Estados Unidos, dunay 13,000 ka sakop ug 17,000 ka diplomates.
Apan usa ka psychiatry professor sa Washington University sa St. Louis nakadawat og ACFEI certification bisan wa niya tubaga ang mga pangutana sa ethics test nga iyang gihulagway nga labihan kataphaw. Nakadawat sab og certification sa ACFEI si Seymor Schlager bisan napriso sa attempted murder. Niadtong 2002, usa ka babaye nakakuha og certification para sa iyang iring.
* * *