Nagnihit o gitagoan?
Sugod sa Lunes sa sunod semana, may mapalit na sab nga baratong bugas humay sa National Food Authority (NFA) sa kamerkadohan sa Sugbo, Bohol, Negros Oriental, ug Siquijor. Kini human nihukom ang NFA nga mobalik og panghatag og rice allocation ngadto sa ilang accredited retailers.
Nakamatngon ba ang NFA nga sayop ang ilang pagputol sa rice allocation sugod niadtong Pebrero 1? Nadutlan ba sa mga pagsaway nga ang ilang pangangkon sa kanihit sa NFA rice nakapasulbong sa presyo sa kamerkadohan? O natay-og sa mga awhag sa resignasyon ni NFA Administrator Jason Aquino?
***
Ang labing uwahing lakang sa NFA nakapasamot sa pagduda sa kamatinud-anon sa ilang pangangkon nga nagnihit ang ilang bugas humay. Sila ang niboluntaryo sa kasayuran pinaagi sa pagluwat og press release, wa gani magpaabot nga pangutan-on sa mga sakop sa media.
Sa sinugdanan, nipasabot nga ang nahibiling bugas gitagana nila alang sa mga biktima sa katalagman. Apan nitiyabaw ang Department of Social Welfare and Development7 nga naputol ang ilang pagpada og hinabang sa mga biktima sa pag-ulbo sa bulkang Mayon kay wa na sila hatagi og bugas sa NFA.
***
Kon tinuod ang ilang pangangkon nga kapin sa usa ka adlaw na lang ang nahibiling pundo sa ilang bugas humay, unsa man ang ilang i-apud-apod sa lisensiyadong retailers sa NFA rice sa Sugbo karong Lunes?
Nabisto na hinuon nga duna pa g'yud diay silay igong suplay sa bugas humay kay nakahatag na man niadtong Martes karong semanaha og rice allocation sa ilang accredited retailers sa Bohol, Negros Oriental, ug Siquijor.
***
Unsa man g'yud ang tinuod? Nagnihit o gitagoan sa NFA ang ilang imbentaryo aron pagpamugos sa dugang importasyon sa bugas humay? Si Senador Kiko Pangilinan nga niduaw sa Sugbo gahapon kumbinsido nga may gipasiugdahang maniobra ang NFA. Matod ni Pangilinan nga sa mga adlaw nga nawagtang ang NFArice sa kamerkadohan nangangkon ang NFA nga nipagawas sila og 240% sa ilang rice allocation.
Nagharab-harab ba lang ang kadagkoan sa NFA sa higanteng komisyon sa importasyon sa way paghunahuna nga ang ilang kahakog mao'y nakapaburot sa presyo sa commercial rice ug nakapasamot sa kalisod sa labing kabos nga mga konsumidor?