Binirahay sa lana

Sa ikaduhang sunudsunod nga semana, mosaka ang presyo sa lana. Banabana sa mga eksperto sa industriya sa lana sa uminto sugod karong Martes sa buntag: 40 ngadto sa 50 sentabos matag litro sa gasolina; 20 ngadto sa 30 sentabos matag litro sa krudo; ug 70 ngadto sa 80 sentabos matag litro sa kerosene.

Pangagpas sa mga eksperto sa presyo sa lana karong tuiga: Di mosulbong sa makalilisang nga ang-ang niadtong 2014; apan di motidlom sa labing ubos nga ang-ang sa niaging tuig.

* * *

* * *

Dagko ang benepisyo sa Saudi ug Russia sa higpit nga pagpatuman sa kalibotanong kauyonan paglaslas sa produksiyon sa lana ug paglugway ini hangtod sa Disyembre karong tuiga:

• Sa matag dolyar nga tidlom sa presyo sa lana, mawad-an ang Russia og $2 bilyones nga kita sa iyang nasudnong ekonomiya; sa pikas nga bahin

• Ang taas nga presyo sa lana mogarantiya og mas taas nga presyo sa shares sa Aramco (Saudi Arabian Oil Company) nga sa labing unang higayon ipamaligya sa publiko karong tuiga.

* * *

Apan nahibawo ang Saudi ug Russia nga di molahutay ang ilang pagkonsabo sa paglaslas sa kalibotanong suplay sa lana tungod sa mga puwersa nga di nila makontrolar:

• Ang bag-ong teknolohiya nga nakahatag sa shale oil producers sa katakos pagpabaha og lana bisan pa kon mobalik pagtidlom ang presyo ug makahimo sa Estados Unidos nga net exporter sa lana unya sa 2022; ug

• Ang mga sakop sa OPEC, sama sa Kuwait, United Arab Emirates, ug Iraq, nipasidaan nga mobalik na sa ilang naandang produksiyon sa lana sunod tuig.