Kolorum nga linog
Dunay 13 ka linog niadtong Martes, Marso 6, nga narehistro sa Philippine Institute of Volcanology and Seismology (Phivolcs). Upat ang niigo sa Luzon, upat ang niigo sa Mindanao ug lima ang niigo sa Kabisay-an. Apan way bisan usa nila nga nahitabo dinhi sa Sugbo.
Tulo ka linog ang nahitabo sa wa pa ang pagkahugno sa bunkhouse sa construction workers sa Lahug, Cebu City ug napu ang nahitabo human sa pagkahugno nga nikalas og lima ka kinabuhi ug nakaangol og 55 ka trabahante nga nangatug sa upat ka andana nga bunkhouse.
Way bisan usa sa mga linog ang nahitabo dungan sa pagkahugno sa bunkhouse. Ang labing sikit og oras mao ang magnitude 2.1 nga linog sa alas2:43 sa kaadlawon, o 14 ka gutlo sa wa pa mahugno ang bunkhouse sa alas-2:57 sa kaadlawon.
Apan labihang layoa sa nahitaboan, silangan nga bahin sa Baras sa Catanduanes sa Bicol, nga segun sa Google Maps 526 ka kilometro gikan sa Lahug. Way intensity nga nasukod ang Phivolcs kay way tay-og nga nabatyagan sa Catanduanes. Lisod ipasangil sa mao’ng linog ang trahedya sa Lahug.
Kinadul-an sa nahugno nga bunkhouse ang linog sa Sagay City sa Negros Occidental nga segun sa Google Maps 194 ka kilometro gikan sa Lahug. Apan ang magnitude 2.1 sab nga linog nahitabo sa alas-7:03 na sa buntag, o upat ka oras ug unom ka gutlo human sa pagkahugno.
Mas lisod tuohan nga ang hinay nga linog nitay-og ug nipahagba una sa bunkhouse sa Lahug sa wa pa mamatikdi sa kahimanan sa Phivolcs sa 22 ka kilometro sa amihanan silangang bahin sa Sagay.
Segun ni Cebu City Legal Officer Joseph Bernaldes wa ma-renew ang business permit sa J.E. Abraham C. Lee Construction and Development Inc. sukad niadtong 2001 human nagparehistro niadtong 1999.
Way nahibawo kon ang kompaniya duna bay seismograph, seismoscope ug ubang kahimanan nga makabatyag og mga linog nga di mabantayan sa Phivolcs. May sukaranan hinuong pagduda nga ang kompaniya gawas nga di kamao nga motuman sa mga lagda sa business ug building permits ug minimum nga suholan ug mga benepisyo sa mga mamumuo, di sab kamao nga modawat og responsibilidad sa way pagduhig sa kinaiyahan.