Apiki ang NFA
Wa pa mahuman ang pagpanulisok ni National Food Authority (NFA) Administrator Jason Aquino sa iyang labaw ug mortal nga kaaway nga si Cabinet Secretary Jun Evasco, ang tsirman sa NFA Council, sa pagtidlom sa ilang imbentaryo nga nakapugos nila sa pagkuha sa baratong NFA rice gikan sa kamerkadohan sud sa usa ka buwan.
Matod ni Aquino kon giaprobahan pa lang unta sa NFA Council ang importasyon sa bugas humay niadtong Oktubre sa niaging tuig, kanus-a $328 matag tonelada pa ang presyo sa ubang kanasuran, mas ubos sa presyong $420 matag tonelada niadtong Pebrero, di unta mawa ang P27 matag kilo ug P32 matag kilo nga NFA rice sa kamerkadohan nga mao'y nakapasulbong sa presyo sa commercial rice.
***
Wa hinuon mapasabot ni Aquino nganong kon tinuod nga nitidlom na ang ilang buffer stock sa NFA rice ngadto sa duha na lang ka adlaw, inay sa 15 ka adlaw nga gitakda sa Legislative-Executive Development Advisory Council (LEDAC), nganong gibalik man nila ang NFA rice sa kamerkadohan karong buwana?
Dihang gihunong ang allocations sa NFA retailers niadtong Pebrero 1, niingon ang NFA nga tulo ka adlaw na lang ang ilang buffer stock. Karong niabot na lang 1.7 ka adlaw ang ilang imbentaryo, namaligya na hinuon sila og balik. Tungod ba ni sa sibaw na ang awhag sa pagpalagpot ni Aquino sa NFA?
***
Giaprobahan tuod sa NFA Council ang importasyon apan moabot unya sa Hunyo. Maong nanghangyo si Aquino sa mga mag-uuma sa pagbaligya sa ilang mga tipasi ngadto sa NFA aron motubo og balik ang ilang imbentaryo.
Samtang nagsugod na ang ani sa mga basakan sa pipila ka bahin sa nasud, di maayo ang timaan. Sa Enero ug Pebrero ning tuiga, ang NFA nakapalit lang og 7,469 ka sako sa tipasi gikan sa mga mag-uuma sa Antique, Bukidnon, Nueva Vizcaya, ug Catanduanes.
***
Nagtinguha ang NFA pagpamalit og 10% sa 4.7 ka tonelada nga ani karong ting-init pinaagi sa ilang kapin sa 400 ka buying stations sa tibuok nasud.
Apan nitahan nang daan si Aquino nga di lingion sa mga mag-uuma ang palit sa NFA nga P17 matag kilo kay ang pribadong mga negosyante mamalit og P22 matag kilo.