Pagbudhi sa mga anak sa singot
Pagtapos sa endo ang gisaad ni Presidente Rodrigo Duterte sa niaging kampanya. Wa siya mosaad og regulation lang sa endo. Gipasaligan niya ang mga botante nga hingpit niyang papason ang endo. Wa siya maghisgot nga mahimong tugotan ang endo sa pipila ka industriya.
Mao nga may sukaranan ang kahugpongan sa mga mamumuo nga nisalikway sa executive order nga gipirmahan sa presidente atol sa iyang pagduaw sa Sugbo niadtong Labor Day. May katungod ang mga anak sa singot nga makabatyag nga gibudhian sila ug nga nitalaw si Presidente Duterte sa pagpanalipod nila.
Si Presidente Duterte ang labing una sa tanang nanagan pagka presidente niadtong 2016 nga nihimo sa kawsa pagtapos sa endo nga kabahin sa iyang plataporma. Nisunod na lang ang ubang mga kandidato ug kandidata niya dihang nitumaw nang endo nga usa sa labing mahinungdanon nga isyu sa kampanya.
Mahimong nakumbinser gyod ang presidente dihang kandidato pa sa kadinalian ug kamakiangayon sa panginahanglan sa pagpahamtang na og kinutoban sa makauuwaw nga pagpangyatak sa katungod sa mga mamumuo. Apan nausab ang iyang panglantaw human sa pormal nang pagbanos sa Malakanyang.
Mahimong gitan-aw sa presidente ang pagsaad nga tapuson ang endo nga usa sa makapadaog niya sa piniliay sa labing taas nga katungdanan sa nasud. Mahimong nakumbinser nga diay hingpit nga mapapas ang endo karon nga siya na ang aktuwal nga nagduma sa nasud.
Tingali may kasayuran na siya nga nakuha karon nga wa niya mahibaw-i atol sa kampanya. O tingali mas sayon ang pagpasalig sa buwan ug mga bituon atol sa pagpangampanya kay sa pagpangatungdanan.
Ang mas nakapaapiki sa baruganan ni Presidente Duterte mao ang iyang tinguha pagtuman gyod unta sa iyang saad ug ang pagpanghunaw na karon nga inutil diay siya sa hingpit nga pagtapos sa endo. Kay tungod sa iyang kaisog ug popularidad, wa siyay di mahimo ---- kapin na sa 20,000 ang nangamatay sa kampanya batok sa ilegal nga drugas ug gitakopan niya ang Boracay.
Maong may sukaranan ang mga mamumuo nga motulisok niya nga isog lang sa pagpapriso ni Senador Leila de Lima ug pag-ihaw sa mayukmok nga mga durugista apan kakak batok sa drug lords ug hakog nga mga negosyante.