Pahimus sa PhilHealth
Makapabalaka ang higanteng alkanse sa Philippine Health Insurance Corp. (PhilHealth) nga sa labing uwahing ihap niabot na og P8.92 bilyones. Hinaot nga masulbad sa labing daling panahon aron nga di mameligro ang gipasalig nga universal health care alang sa katawhang Pilipinhon labi na sa labing kabos nga mga pasyente.
Kon di makabawi ang kahimtang sa panalapi ang PhilHealth unsa man intawon ang mahitabo sa mga benepisyo nga gisaad sa mga kawani sa gobyerno ug pribadong mga kompaniya nga mao’y nagtumpi sa pundo pinaagi sa binuwan nilang tampo sud sa daghan nang katuigan? Mas sayon sabton ang alkanse sa PhilHealth kon naggumikan sa kaagresibo nilang nilusad og bag-ong mga benepisyo alang sa ilang mga sakop. Sama sa automatic nga enrolment sa senior citizens nga gisugdan sa pamunoan pa ni kanhi presidente Noynoy Aquino.
Si Senador Risa Hontiveros, dihang sakop pa sa PhilHealth Board of Directors, ang nipahibawo sa Arangkada sa dyAB Abante Pa, Bisaya! nga si bisan kinsang moabot og 60 anyos makapahimus na sa tanang benepisyo sa PhilHealth bisan wa pa mahingpit ang mga panginahanglan sa ilang enrolment.
Mas lisod dawaton ang alkanse sa PhilHealth tungod sa mga timaan sa makauuwaw nga pagpahimus sa bag-ong mga tagduma nga gipasanginlan nga nihimong gatasan sa panudlanan nga alang unta sa mas nagkinahanglan nga mga pasyente.
Makahasol ang pasangil sa Commission on Audit (COA) nga pag-usik-usik sa dul-an sa milyon ka pesos nga kuwarta sa PhilHealth sa Bol-anon nga presidente ug chief executive officer nga si Dr. Celestina Ma. Jude dela Serna tungod sa iyang mga biyahe, mga hotel, ug ilegal nga allowances.
Kon nahimo ning dela Serna, nga anak ni kanhi Bohol governor Victor dela Serna, magtutudlo ni Presidente Rodrigo Duterte sa San Beda College of Law nga iya sang gitudlo sa consultative committee pagsugyot og kausaban sa 1987 Constitution, unsa may garantiya nga wa ni himoa sa uban pang opisyal sa PhilHealth?
Nagsugod ang alkanse sa PhilHealth, nga himsog ang kita sa nangaging pamunoan, sa pagpuli nilang dela Serna ug sa ubang tinudlo ni Presidente Duterte niadtong Hulyo 2016. Unsa may nahitabo sa pasalig sa presidente sa pagbadlong sa mga pangurakot sa iyang pamunoan?