Kublan diay sila

Niay di maayong mga timaan sa gibalikbalik ni Presidente Rodrigo Duterte nga determinado niyang kampanya batok sa pangurakot: Sa 16 ka opisyal nga iyang gitaktak, tulo ray napasakaan og kaso samtang tulo sab ang iyang gitudlo og laing mga katungdanan:

•Ang tulo nga gikiha mao silang kanhi Customs commissioner Nicanor Faeldon, ug kanhi Immigration commissioners Al Argosino ug Michael Robles; samtang

•Ang tulo nga gitudlo og laing katungdanan mao silang Faeldon, kanhi Presidential Commission for the Urban Poor (PCUP) commissioner Melissa Aradanas, ug kanhi Social Security System (SSS) commissioner Jose Gabrial "Pompee" La Viña.

Way kaso nga gipasaka batok sa siyam ka opisyal nga gipasanginlan ni Presidente Duterte nga nag-usik-usik sa kuwarta sa gobyerno sa nasobrahang laag: Silang kanhi Dangerous Drugs Board chairman Dionisio Santiago; kanhi PCUP chairman Terry Ridon; ug kanhi PCUP commissioners Aradanas, Manuel Serra Jr., Noel Indonto, ug Joan Lagunda; kanhi DevelopmentAcademy of the Philippines president Elba Cruz, kanhi Maritime Industry Authority administrator Marcial Amaro III; ug kanhi Commission on Higher Education chairwoman Patricia Licuanan.

Gawas nga wa ikiha, wa sila sugoa sa presidente pag-uli sa kuwarta nga ilang giusikan. Mas palaran si Aradanas, igagaw sa kapuyo sa presidente nga si Honeylet Avanceña, kay gitudlo nga Deputy Secretary General sa Housing and Urban Development Coordinating Committee.

Panagang sa Malakanyang nganong way kiha ang gitaktak nga mga opisyal nga gipasanginlan og kahiwian nga naglakip sab nilang kanhi National Irrigation administrator Peter La Viña, kanhi Interior secretary Ismael Sueno, kanhi Energy Regulatory Commission chairman Jose Vicente Salazar, kanhi Budget undersecretary Gertrudo de Leon, kanhi SSS chairman Amado Valdez ug kanhi Labor undersecretary Dominador Say: Si Ombudsman Conchita Carpio-Morales ang angay nga mokiha nila.

Apan dihang gikiha ni Morales ang usa nila, gitudlo siya sa presidente og laing katungdanan.

Si Faeldon mao nay Deputy Administrator sa Office of Civil Defense bisan gipasakaan na sa Ombudsman og kasong pagpangawkaw tungod sa P6.4 bilyones nga shabu nga gipayuhot gikan sa China ug nakalusot sa Bureau of Customs.

Apan padayong gipasalamatan sa presidente si Faeldon nga dako og tabang sa iyang kandidatura. Nga mas mahinungdanon diay alang niya kay sa kampanya batok sa pangurakot.