Nawani sa baratong lana

Napuslan ni Presidente Rodrigo Duterte ang iyang kasuod ni Russian President Vladimir Putin tungod sa pagsanong dayon sa Moscow sa pagpangita sa Pilipinas og laing tinubdan sa lana gawas sa Organization of Petroleum

Exporting Countries (OPEC).

Apan nipasabot ang Department of Energy (DOE) nga ang lana gikan sa Russia di makapa-us-os sa lokal nga presyo kay igo rang mopalambo sa atong imbentaryo. Ang wa nila isulti mao nga di barato ang lana sa Russia, nga mao'y nakigkonsabo sa Saudi Arabia sa artipisyal nga paglaslas sa produksiyon aron moburot ang presyo.

***

Mahimong nasayop si Presidente Duterte sa pagpili sa Russia isip alternatibong tinubdan sa lana. Klarong way nakahunghong niya nga dunay mas baratong lana nga gikuninitan karon sa atong silingan nga mga nasud sa Asya.

Gani, bisan ang lain niyang idolo, gawas ni Putin, nga si Presidente Xi Jinping sa China nitalikod sa dugay na unta nilang suki nga Saudi Arabia ug nahimo na nga labing dakong kustomer sa bag-ong tinubdan sa lana sa Asya. Nikompra ang China og 16 milyones ka baril sa lana para sa tibuok buwan sa Hunyo.

***

Kinsa man ning labing bag-o nga exporter sa lana sa Asya? Nakatag-an ka: Ang Estados Unidos. Nga tungod sa naghinobra nilang produksiyon, nibalik na sa pagpamaligya og lana sa ubang kanasuran.

Kay wa man moapil sa higante nga konsabo sa paglaslas sa produksiyon sa OPEC nga gipangulohan sa Saudi Arabia ug non-OPEC countries nga gipangulohan sa Russia, gawasnon ang mga Amerikanhon sa pagsakmit sa mas dakong bahin sa kalibotanong merkado.

***