Lahutay sa Kapamilya Run
Diha’y mga higayon nga gibug-atan na mi sa daghang kakulian pagpasiugda og tinuig nga lumba sa dagan nga nakahuna-huna mi nga makiglambigit na lang sa mga mas lapad og kasinatian sa hapit matag semanang kalihokan.
Apan sa matag higayon may mohunghong namo nga lahi ang Kapamilya Run, usa sa kasaulogan sa anibersaryo sa dyAB Abante Pa, Bisaya! matag Hunyo. Nga mao ra ni lumba nga nagdasig sa tibuok pamilya sa paghiusa sa pagdagan, sa way pagpalabi sa ginansiya ug sa paghalad sa kita ngadto sa labing nagkinahanglan nga mga masakiton.
Mao nga sa makausa pa, nia nagtuga-tuga na sab mi og pahigayon sa dyAB Island Premium Paints Kapamilya Color Run karong sayo sa buntag sa Ayala Terraces sa Cebu Business Park ug sa labing dagkong kadalanan sa Dakbayan sa Sugbo.
Nahuman na tingali ang lumba sa higayon nga nakabasa ka ini. Nanghinaot ming nilampos ang mga paningkamot paghimo sa lumba nga mas hapsay, mabulukon ug makahuloganon alang sa tanang nanagan ug nanan-aw ug makatigom og mas dakong pundo alang sa mga pasyente sa Tabang Patrol sa dyAB ug TV Patrol Central Visayas.
Dakong hagit ang pagkumbinser sa mga mangapil sa pagpalista og sayo. Kasagaran nila, tungod tingali sa kadaghan sa mga lumba nga ilang kapilian, magpa-rehistro sa kataposan nang mga adlaw. Mao’ng magpunsisok ang registration centers sa bisperas ug sa kadlawon sa lumba.
Lisod sang pagbanabana sa gidaghanon ug gidak-on sa running shirts ug kategoriya sa race bibs aron di magkuwang ni magsobra. Ang mga mauwahi mapugos pagsul-ob og mas luag o mas hugot ug bibs nga gisapawan og pentel pen ang mga kategoriya.
Salamat sa among mga kaabag, Sports and Fitness Enthusiasts (SAFE) ni Joel Baring nga mao’y race director, Megawear ni Excel Canque, ang naghimo sa shirts ug race bibs, ug MetaJe Engravers, ang nagumol sa mga medalya, nakahilwas mi sa kaliboan ug usa ka gimbuhaton.
Salamat sab sa mga manggihatagon nga nitunol og kuwarta aron libre ang pagdagan sa kabos nga kabataan sa kabarangayan ug nihalad og dugang pagkaon alang sa mga nangapil. Ug sa mga nanagan, nga kasagaran mga sakop sa pamilya, kompaniya, ug kahugpongan, daghang salamat sa inyong pagsalig.