Propagandistang ekonomista
Sa padayon nga pagtibugsok sa bili sa peso, nga nitidlom na gahapon sa buntag ngadto sa P53 sa usa ka US dollar sa labing unang higayon sukad niadtong 2006, ang mga eksperto sa ekonomiya nga naglibot ni Presidente Rodrigo Duterte nimatuod na sab nga mas ganahan sila nga mag-propagandista inay nga mohatag sa tinuod nga hulagway ngadto sa katawhan.
Ambot nabalaka ba lang nga matulisok kon angkunon ang di maayong kahimtang sa nasudnong ekonomiya, o mga bakakon lang gyod, nagkapuliki sila paglikoy sa istorya aron makapasigarbo gihapon sa ilang gisaad nga kausaban.
* * *
Kinaham nila nga panagang mao nga di angay nga ika-alarma ang pagtibugsok sa peso kay ang mga kuwarta sa ubang kanasuran nihuyang sab tungod sa paglig-on pag-ayo sa US dollar, nga nanukad sa dako ug paspas nga paglambo sa Amerikanhong ekonomiya.
Apan langyaw nga mga ekonomista niingon nga ang peso mao ang labing dako og tibugsok atubangan sa dolyar. Nihuyang tuod ang ubang mga kuwarta apan di sama sa peso. Nga ila nang gideklarar sukad pa sa niaging tuig nga maoy labing huyang nga kuwarta sa tibuok Asya.
* * *
Laing mga panagang sa economic advisers ni Presidente Duterte:
• Niinsistir si Budget Secretary Benjamin Diokno nga ang pagtibugsok sa peso makapadako sa bili sa dollar remittances sa Overseas Filipino Workers (OFWs) ngadto sa ilang mga pamilya dinhi; ug
• Nipasalig si Trade Secretary Ramon Lopez nga ang huyang nga peso makahimo nga mas barato ug busa mas halinon sa furniture ug ubang export products sa Pilipinas ngadto sa Estados Unidos ug ubang kanasuran.
* * *
Sayon nila nga gilaktawan ang di maayong mga epekto sa padayon nga paghagsa sa peso:
• Nisamot pagburot ang langyaw’ng utang sa Pilipinas (kay dolyar man), nga pas-anon hangtod sa sunod nga mga henerasyon, ngadto sa P6.73 trilyones;
• Ang pagsaka sa kita sa atong exports (P62.9 bilyones) napapas sa pagburot sa gasto sa atong imports (P92.7 bilyones), ang kinatibuk-ang alkanse sa atong patigayon sa ubang kanasuran nikabat na og P29.8 bilyones; ug
• Ang huyang nga peso padayong mopaburot sa presyo sa lana (nga gibase sa dolyar) ug sa inadlaw nga mga palaliton (kansang raw materials kinompra gikan sa ubang kanasuran ginamit ang dolyar).