DTI itoy sa puhonan
Ang pag-insistir ni Trade Secretary Ramon Lopez nga di angay nga umintohan ang suholan, ug kon umintohan man gamayon lang, atubangan sa pahibawo sa Bangko Sentral ng Pilipinas (BSP) nga ang inflation rate nahimong 4.6% tungod sa pagsulbong sa presyo sa mga palaliton human sa pagpatuman sa Tax Reform for Acceleration and Inclusion (TRAIN), nagmatuod nga di makakuha og kaangayan ang mga mamumuo kon ang economic advisers ni Presidente Rodrigo Duterte ang paundayonan.
Determinado silang Lopez ug kaubanan pagpamugos sa ilang gusto. Bahala na kon nisukwahi sa aktuwal nga mga panghitabo.
Si Lopez ug ang Department of Trade and Industry (DTI) g’yud unta ang labing unang nahibawo sa makalilisang nga pagsaka sa presyo sa inadlaw nga mga panginahanglan sa katawhan tungod sa sunudsunod nga paglayat sa presyo sa mga produkto sa lana nga gipatongan og bag-ong excise taxes sa TRAIN.
Apan dayon siyang nipaugat nga gamay rang uminto sa mga presyo ug nga may mga rehiyon man gani nga wa motubo ang inflation rate. Wa ba siya mobasa sa resulta sa ilang price monitoring? O gimaniobra ang ilang kaugalingong mga numero?
Sukad natudlo sa gabinete ni Presidente Duterte, wa pakita si Lopez og bisan gamay na lang nga timaan sa pagpakabana alang sa interes sa mga konsumidor. Gitahan niya ang gahom sa pagtakda sa suggested retail prices (SRP) sa batakang mga produkto ngadto sa labing dagko nga mga negosyante.
Ang pagtakda sa manufacturers sa presyo sa ilang mga baligya sama rang gitugotan sa National Basketball Association (NBA) si LeBron James pagbuot dos puntos o tres puntos bang iyang iskor.
Karong gipamatud-an nang Lopez nga supak diay siya sa makiangayon nga uminto sa suholan, bahala na kon lunosan sa gutom ang mga anak sa singot basta lang nga di maibanan ang ginansiya sa iyang suod nga mga negosyante, angay pa bang palingkuron ang DTI regional directors sa regional wage boards?
Gawas nga maglisod sila pagsukwahi sa baruganan sa ilang amo, may sukaranan pa g’yud ang mga kabalaka nga doktoran ang mga numero nga ipakita atol sa ilang mga deliberasyon aron lang pagluok sa labor ug pagpalabi sa ilang pinangga nga mga tag-iya sa puhonan.