Pagpanakop sa kadalanan

Gawas nga sayop ang Binisaya, nasobrahan rang kaisog ug kahilas sa ngan sa kampanya nga gilusad ni Cebu City Police Director Joel Doria, ang Oplan Tambay o “Tangtangon Ang Maabusado, Badlongon sa katilingban ug Apil niini ang mga Yawan-ong buhat.” Klarong dinalidali ang paghatag og kahulogan sa pung nga “Tambay” ug di Bisaya ang nagtam- bag ni Doria.

Mao nga nangahas og sugyot og mas haom nga kahulogan ang tinuod nga Bisaya nga mga tigpaminaw sa Arangkada sa dyAB Abante Pa, Bisaya! sa Tambay: “Tanggungon Ang Mga Badlungong Yabag.”

Padayon ang pagtuon nilang Doria ug kaubanan sa mga balaod nga ilang magamit sa pagdakop sa mga tawo nga maabtan sa mga polis sa kadalanan gikan sa alas-10 sa gabii hangtod sa alas-3 sa kadlawon. Apil sa ilang nakit-an ang mga balaod batok sa pagpanigarilyo, paghubug-hubog, pagsaba-saba, paghugaw-hugaw ug pagpanawag sa mga pasahero. Gipangita pa nila may balaod bang nagdili sa paghukas.

Magkadaghan ang mga balaod nga ilang maukayan, magkadaghan ang kalapasan nga ilang makit-an. Hinaot nga karon pa lang magtukod na sila og daghan ug dagkong prisohan nga mapahimutangan sa ilang mga dinakpan.

May sukaranan hinuon ang pagtuo nga ang Oplan Tambay, sama sa nangagi nga mga kampanya, di makalahutay. Kisaw kaayo ang pagpanakop sa mga motorista dihang napasar ang Anti-Distracted Driving Act apan karon wa na g’yuy naghisgot ni nagtagad sa pagpatuman sa ADDA.

Mahimong naukyab lang ang kapolisan kay nahisgutan ni Presidente Duterte ang mga tambay. Sa sunod buwan, mahimong may lain na sang mahisgutan ang presidente ug may lain na sang tutokan ang kapolisan.

Samtang manakop ang mga polis sa mga kadudahang maghimo og mga krimen sa lawom nang gabii, di mahimo nga molingiw lang sila sa ubang mga bayhon sa kadalanan: Ang mga pamilya nga nangligdas kay naa na magpuyo sa sidewalk; ug mga nalisoan sa pangisip nga wa nay kapaulian.

Ang mas makahuloganong kampanya di ang paghawan lang sa kadalanan kon dili ang paghaw-as sa mga way laing kapahimutangan. Ang labing makiangayon nga kampanya di ang pagdakop kon dili ang pagtabang nila. Lain namong tigpaminaw nisugyot og laing kahulogan sa Tambay: “Tabangan Ang Mga Binuhat sa Ginoo Ayaw Yam-iri.”