Estupido nga paukyab
Nahilaw na sab ang mga tigpamaba ni Presidente Rodrigo Duterte nga nagkapuliki sa pagpanagang sa sibaw nga mga pagsaway sa nagkalainlaing sektor sa katilingban apil nang lunod patay unta niyang mga dumadapig tungod sa iyang pagtawag sa Ginoo nga estupido.
Human sa lawom kaayo nila nga katin-awan — nga ang presidente wa pa hingpit nga makahilwas gikan sa pagpanamastamas sa usa ka Amerikanhong pari niya ug nga ang presidente igo lang nipasundayag sa labing taas nga ang-ang sa spirituality — niluwat si Presidente Duterte og mas yano nga katin-awan: Paukyab ra diay tong iya.
***
Lisod ang trabaho sa mga tigpamaba sa presidente kay gawas nga wa sab sila mahibawo unsay iyang ipanulti wa sab silay kasayuran unsay tinuod niyang gipasabot. Mao nga nahimong taphaw ang pasiuna nga panagang ni Presidential Legal Counsel Salvador Panelo nga wa tawga sa presidente og estupido ang Ginoo kon dili ang mga magsusuwat sa Bibliya nga nagbuut-buot sa di katuohan nga mga detalye sa pagmugna sa kalibotan ug kinabuhi.
Kay mas nangisog na man hinuon ang presidente nga estupido lagi ang atong Ginoo ug nga ang iyang “supreme being” ra maoy makiangayon.
***
Ang pagkumpisal ni Presidente Duterte nga nagpaukyab ra diay siya nakabisto sab nga pangagpas ug buut-buot ra diay ang panagang ni Presidential Spokesperson Harry Roque nga ang personal nga baruganan sa presidente bunga sa pait niyang kasinatian sa Simbahang Katoliko:
• Gilugos siya og paring Jesuit sa Ateneo de Davao University (AdDU) sa bata pa; ug
• Inay manghimaraot sa presidente, ang kadagkoan sa Simbahang Katoliko angay nga mangayo og pasaylo sa mga biktima sa pangabuso sa kaparian.
***
Ambot tungod tingali sa iyang popularidad, nga mahimong nakapakumbinser niya nga mahimo bisan unsay iyang gusto, wa dayon makamatngon si Presidente Duterte nga di mahimong apilon sa iyang naandang mga balikas ug bugalbugal ang Ginoo.
Human sa unang paghingan sa Ginoo nga estupido sa Davao niadtong Biyernes, gipun-an og mas grabeng balikas sa laing diskurso sa Cagayan de Oro niadtong Lunes. Nagsugod og atras sa iyang diskurso sa Zamboanga ang pagtukod og komitiba nga makigtagbo sa Catholic Bishops Conference of the Philippines niadtong Martes. May sukaranan hinuong pagduda sa mga obispo nga gibuangan gyong presidente nila.