Nasipyat sa pagbalimbing
Nagngutngot nga kabalaka ang nabatyagan sa mga politiko nga nipaundayon sa nangalisbo nga politikanhong tradisyon, way lingi-lingi nga nilayas sa ilang karaang mga partido ug niambak ngadto sa Partido Demokratiko Pilipino-Lakas ng Bayan (PDP-Laban).
Gipakaingon nila nga makapahimus sa bag-ong pamunoan pinaagi sa paglayat sa partidong gidaganan ni Presidente Rodrigo Duterte. Apan inanay nga nabantang nila ang nagkadaghan nga mga timaan nga mahimong di diay mao ang partido nga ilang natugpahan. Gani, may mga kauban na sila nga nilayat na sab ngadto sa bag-ong partido nga gituohang mas duol sa luwag.
***
Ang bag-o nilang nakit-an nga posibleng tinuod nga partido sa administrasyon mao ang Hugpong ng Pagbabago (HNP) nga gitukod ni Davao City Mayor Sara Duterte. Ang HNP mopalapad sa Hugpong sa Tawo’ng Lungsod nga gitukod ni Presidente Duterte dihang mayor pa sa Davao City.
Matod ni Mayor Duterte ang HNP mao ang tinuod nga moduso sa mga programa sa iyang amahan alang sa nasud ug sa kinabag-an sa katawhan. Gipasanginlan niya ang ubang mga partido nga igo lang mopalambo sa hakog nga politikanhong mga interes sa ilang mga lider.
***
Sa sinugdanan niinsistir ang mga hingtungdan nga way away ang HNP ug PDP-Laban: Gawasnon ang mga sakop sa HNP pagpasakop og nasudnong mga partido sama sa PDP-Laban; samtang gawasnon sab ang taga PDP-Laban nga magpasakop sa lokal nga mga partido sama sa HNP.
Apan wa magdugay niulbo dayon ang gubat: Gipasanginlan ni Mayor Duterte si House Speaker Pantaleon Alvarez, kalihim heneral sa PDP-Laban, nga nitawag niya og oposisyon; ug niawhag siyang palagputon si Alvarez sa pagka-speaker.
***