Pagtiwas ni Alvarez
Usa ug tunga ka oras sa wa pa ablihi ang sesyon sa House of Representatives niadtong Lunes, nahibawo na si kanhi Speaker Pantaleon Alvarez nga wa na siya paluyohi sa mayoriya sa mga kongresista. Atol sa caucus nga gipatawag sa iyang pangabaga nga si Majority Leader Rodolfo Fariñas
sa alas-8:30 sa buntag niadtong Lunes, 76 na lang sa 291 ka kongresista (26%) ang nitambong.
Inay dawaton ang iyang kaparotan ug malinawon nga itahan ang liderato sa House, gipili ni Alvarez ang pagpaugat. Nidiskurso gihapon ug giputol dayon ang sesyon sa wa pang kaugpo ang iyang mga kaatbang.
***
Ambot nganong wa na lang g’yud sunda ni Alvarez, kalihim heneral sa PDP-Laban, ang iyang katagi-Mindanao nga presidente sa partido, si kanhi senate president Koko Pimentel, nga human sa pasiunang pagdumili niangkon nga wa na siya saligi sa mayoriya sa iyang kaubanang senador.
Pagkahibawo ni Pimentel nga ang 14 ka senador nahimong 15 human nipirma si Senador Grace Poe sa resolusyon nga nagsuporta ni Senador Tito Sotto isip bagong Senate President, niapil siya og pirma sa resolusyon ug nikanaog sa katungdanan.
***
Human sa laktod nga pagputol sa sesyon, nga nisakripisyo sa nasabotan sa Senado ug sa Malakanyang nga dinaliang pagpasar sa hiniusang bersiyon sa Bangsamoro Organic Law (BOL), gipasiugdahan pa g’yud sa kampo ni Alvarez ang mosunod nga mga maniobra:
•Gipawong ang sound system ug gitago ang mace, ang simbolo sa House, atol sa pagpanumpa ni kanhi Presidente Gloria Macapagal-Arroyo; ug
•Gibabagan si Arroyo pagsud sa holding room nga nahimutangan ni Presidente Rodrigo Duterte dayong SONA.
***
Unsa may nakuha ni Alvarez sa paglangay sa pagbanos ni Arroyo sa iyang katungdanan? Nagpaabot bang lumsan siya og kaluoy sa presidente ug mobalik pagyukbo niya ang mayoriya sa mga kongresista? Nagtuo bang maikog si Arroyo nga mohikaw niya sa kahigayonan pagduma sa House sa ikatulong sunudsunod nga SONA?
Ang papating ni Alvarez motino nga mingaw ang iyang kataposang tuig isip kasarangang kongresista. Iyang mga maniobra mopasamot lang sa kasuko ni Davao City Mayor Sara Duterte Carpio. Nga nimatuod na sa iyang katakos pagpalagpot ni Alvarez sa nasudnong liderato ug mahimong motiwas g’yud pagpalayas ni Alvarez gikan sa iyang distrito.