Labing gipangita sa Google
Tungod sa librong “Everybody Lies” ni data scientist Seth Stephens-Davidowitz, nga nakakaplag nga kasagaran nato mamakak sa surveys ug sa social media apan mosulti sa tinuod sa atong pag-inusara sa paghimo og Google search, nisuway ko paggamit sa labing yano niyang kahimanan sa pagsusi sa nagbuntaog nga search data sa nangaging katuigan.
Ang Google Trends (trends.google.com) libre nga magamit ni bisan kinsa, di mopakita sa pribadong kasayuran apan mohulagway sa kinatibuk-an nga kasayuran sa binilyon ka searches sa Google sa tibuok adlaw ug tibuok gabii sa nagkalainlaing kanasuran sa kalibotan. Gisusi nako sa Google Trends sa Pilipinas unsa kadaghan ang searches sa akong giisip nga upat ka labing inilang personalidad sa gobyerno karon, silang Presidente Rodrigo Duterte, Bise Presidente Leni Robredo, kanhi senador Bongbong Marcos, ug House Speaker Gloria Macapagal Arroyo.
Sa niaging tuig, Hulyo 2017 ngadto sa Hulyo 2018, si Duterte ang labing popular sa Google search sa Pilipinas, may average nga 27. Managsama nga tagsa ka search ra silang Robredo, Marcos ug Arroyo. Nisulbong ang searches karong semanaha: Duterte, 100; Arroyo, 19; Robredo, 2; ug Marcos, 1. Sa tanang rehiyon sa Pilipinas, labing daghang search ni Presidente Duterte sa Autonomous Region in Muslim Mindanao (99%), ang nahibiling 1% iyang Robredo; sa Central Visayas, 95% ang nag-search ni Duterte, 3% kang Arroyo ug managsamang 1% silang Robredo ug Marcos.
Labing daghang search parang Robredo sa Bicol (9%) apan mas daghan gihapong nag-search ni Duterte (85%). Labing daghang search ni Marcos sa Cagayan Valley (5%). Ug ang labing daghang search ni Arroyo sa Eastern Visayas (7%).
Dinhi sa Sugbo, si Cebu City Mayor Tommy Osmeña ang gipangita sa labing daghan sukad sa Hulyo 2017 hangtod sa Hulyo 2018 (27), nagsunod si Presidential Assistant Michael Dino (9) ug si kanhi Cebu City mayor Mike Rama (3).
Ang Google Trends mopakita sab sa realtime search trends sa tanang kanasuran sa kalibotan. Sa akong pagsuwat ini gahapon sa udto, nag-una sa searches sa Google dinhi sa Pilipinas ang mosunod: Bangsamoro Organic Law (kapin sa 10,000); Lunar eclipse (kapin sa 5,000); Park Min Young (kapin sa 2,000); ug Ombudsman Samuel Martires (kapin sa 2,000).