Kahiubos ni Alvarez
Usa sa labing suod ni kanhi House Speaker Pantaleon Alvarez sa Sugbo nipasabot nako sa dakong kahiubos ni Alvarez sa mga Sugbuanon:
-Dihang siya pa ang transportation secretary, katungdanan nga iyang gihuptan sud sa 18 ka buwan gikan sa 2001 ngadto sa 2002, hapit tanang opisyal sa Sugbo
naglumba og hangop pagpangayo og mga proyekto matag duaw niya sa Sugbo; apan
-Dihang nawa na siya sa gabinete ni kanhi Presidente Gloria Macapagal-Arroyo, wa nay nanagad ug morag wa nay nakaila niya sa pipila ka higayon nga nakasuroy dinhi isip pribadong indibiduwal.
* * *
Mahimo nga samang kamingaw ang nisugat sa iyang pagduaw sa ubang bahin sa nasud. Matod sa iyang higala mao ni ang usa sa mga hinungdan sa labihan niyang ka-prangka, way pupanagana ang iyang sinultihan, kapasanginlan gani nga labihan kahambogero.
Kay alang ni Alvarez wa siya’y nautangan og buot gawas ni Presidente Rodrigo Duterte, nga mapasalamaton kaayo sa kusganon niyang pag-awhag nga modagan pagka-presidente. Maong wa siya mobilib, hinunoa nahibawo sa tinuod nga katuyoan sa mga politiko nga nikalit lang og kalami ug naglumba na og amen niya.
* * *
Di kong kalimot sa gibanabana nga 50,000 ka politiko ug dumadapig nga nagtapok sa Plaza Independencia sa
Dakbayan sa Sugbo aron pag-abiba sa liderato ni Alvarez niadtong Nobyembre 2017. Kay bisperas to sa among Grand Halad sa Kapamilya, ang labing dakong piyesta sa libreng mga pangalagad sa Sugbo.
Ang kadaghan sa mga sakyanan nga nanghakot sa mga nanambong sa rally ni Alvarez nakapahuot sa kadalanan ug nakahasol sa among pangandam sa Grand Halad sa main campus sa Cebu Technological University (CTU) nga nahimutang pila lang ka metro gikan sa plaza.
* * *
Apan dihang gipalagpot si Alvarez pagka-speaker, way bisan usa sa mga politiko dinhi sa Sugbo nga puwerteng sipsip niya nga nipadayag og pagsupak sa laktod niyang pagkatangtang. Way bisan gamay’ng ek, bisan pagpadayag na lang og kasubo o kahinugon.
Mas pait para ni Alvarez mao nga siya ang nagpasud sa PDP-Laban sa mayoriya sa mga kongresista nga nibalitok ni Arroyo. Nabalaka kong mahiubos na sab si Alvarez sa mas makabungog nga kamingaw sa umaabot niyang mga pagduaw sa Sugbo ug ubang bahin sa nasud.