Kadaogan sa 93-1

Mao ni ang labing mahinungdanon nga balita karong adlawa: Ang pormal nga pagtak-op sa kapin sa dekada nang kontrobersiya sa 54 ka ektarya nga luna sa 11 ka barangay sa Dakbayan sa Sugbo nga gipuy-an sa lima ka libo ka pamilya ubos sa Provincial Ordinance 93-1 nga napasar sa panahon ni kanhi Gobernador Tingting de la Serna.

Ang tam-is nga gasa ni de la Serna niadtong 1993 alang sa mga kabos nga taga-dakbayan niaslom diha’ng ang nibanos nga pamunoan sa Kapitolyo nihudlat niadtong 2008 pagpalayas sa mga molupyo nga napakyas pagbayad sa ilang luna.

***

Ang hudlat nisangpot sa kagabhion nga way tarung kinatulgan ang mga molupyo tungod sa kabalaka nga mapapahawa na sa mga luna sa pagmata nila pagka sunod adlaw. Apan wa sila mahudlat. Hinunoa, naghiusa sa pagpanalipod sa ilang kaugalingon.

Niboluntaryo sila sa pagpangampanya sa kalungsoran ug mga dakbayan sa Sugbo nga ilang gigikanan batok sa mga tagduma sa Kapitolyo nga nanghasi nila. Sugod karong adlawa, makaginhawa na sila og luag nga di na kahinginlan gikan sa mga luna nga maoy namat-an og buot sa kasagaran nila.

***

Daghan uyamot ang nisuway sa paghusay sa panagsungi. Tungod sa kadaghan sa mga botante nga nahilambigit, mas daghan ang mga politiko nga nisakay sa kontrobersiya. Apil na si kanhi Bise Presidente Jejomar Binay nga isip kanhi pangu sa Pag-IBIG Fund mao g’yud unta ang labing takos nga makasulbad sa problema.

Apan bisan ang nagbuntaog nga pundo sa housing sa PagIBIG napakyas sa pagtapak sa dakong kang-a sa baruganan sa Kapitolyo nga maoy tag-iya sa mga luna ug sa City Hall nga maoy kampeyon sa mga molupyo.

***