Kinsa may di mogara?
Makahasol ang postura ug sinultihan sa pipila ka opisyal sa kapolisan sa Sugbo ug Central Visayas sa niaging mga adlaw. Niluwat sila og mga pasangil batok sa giisip nga ilang kaatbang ug nidupa sa ilang mga sakop sa way pagtagad pagtuman sa batakan nga panginahanglan – ang paghimo una og makuti nga imbestigasyon.
Ang nipasundayag sa mga Sugbuanon nga mahimo ug masulti nila ang bisan unsa nga masud sa ilang hunahuna sa way pagpangita una og sukaranan mao silang Police Regional Office Chief Debold Sinas ug Cebu City Police Chief Royina Garma.
***
Nabantang pag-ayo sa publiko ang makahasol nga mga lakang ni Sinas human sa giingong pagsuway pagbanhig ni Barangay Tejero, Cebu City, councilman Jessielou Cadungog sa niaging Lunes, Hulyo 30:
• Sa Lunes wa pa maapil si Cadungog sa bisan unsang listahan, apan pagka Miyerkules giapil na siya ni Sinas sa narco list sa kapolisan ug ni Presidente Rodrigo Duterte; ug
• Gipasanginlan dayon niya si Cadungog nga mao’y tinuod nga nagpatay ni PO3 Eugene Calumba sa way pagsusi sa CCTV footage ni pagpaabot sa resulta sa paraffin ug ballistics tests.
***
Mas sayo nga nagpakita og di maayong mga timaan si Garma, nga kanunay lang nga mangasaba nga morang gibugoan sa tanang naminaw niya, dihang naangin ang gamay'ng bata sa operasyon sa kapolisan sa Carbon sa Bato, Ermita niadtong Hulyo 10. Hinaot nga nauwaw dihang gibali ni PNP Chief Oscar Albayalde ang iyang pag-insistir nga di relibohan ang nahilambigit nga mga polis.
Sa kaso sa niaging semana, nasuko siya sa mga namasangil ni Calumba bisan way mga ebidensiya apan nitulisok ni Cadungog nga drug protector bisan niangkon nga wa sab siya'y ebidensiya.
***
Di ta kinahanglan nga molantaw sa layo pagpangita diin gikan ang nagkagrabeng kahawod ug paugat nilang Sinas ug Garma, kansang nagsunod nga pag-asumir sa liderato sa PRO-7 ug CCPO nitimaan sab sa pagsulbong sa mga kaso sa patay nga way kasulabaran dinhi sa ato.
Kon ang presidente magbalikbalik og pasalig nga mahimong patyon ang gidudahang mga durugista, nga mahimo rang tamnan og mga ebidensiya, kay wa sila’y tawhanong katungod, ug kon masakpan ang mga polis hatagan niya og pardon, kinsa may di mogara?