Pagsabotahe sa NFA rice
Mas dako pa g’yud diay ang atraso ni Jason Aquino, administrador sa National Food Authority (NFA), kay sa unang gituohan. Gawas nga napakyas sa pagtuman sa iyang trabaho pagtabang sa mga mag-uuma pinaagi sa pagpamalit sa ilang tipasi kon ang presyo sa commercial rice traders mas ubos pa kay sa support price sa gobyerno nga P19 matag kilo, nga nisangpot sa pagkabasiyo sa mga bodega sa NFA, nitumaw ang kahigayonan sa mas dakong maniobra.
Di diay tinuod ang mga pagduda nga di kamao si Aquino sa iyang trabaho. Mahimong tinuyo diay niya ang tanan.
Nahibaw-an sa Commission on Audit (COA) ang tinuod nga hinungdan nganong wa kapamalit ang NFA og lokal nga bugas humay bisan sa kaabunda sa mga ani sa niaging tuig ug karong tuiga: Ang P5.1 bilyones nga gigahin sa Kongreso alang sa food security gigasto ni Aquino sa laing katuyoan.
Sukwahi ni sa pangangkon ni Aquino atubangan sa mga senador ug mga kongresista nga nagsusi sa krisis sa bugas humay: Wa kapalit ang NFA og mga tipasi gikan sa mga mag-uuma kay mas taas ang presyo nga gibungat sa commercial rice traders.
* * *
Ang maayong balita mao nga wa ibolsa ni Aquino ang P5.1 bilyones. Nasubay sa COA nga ang P3 bilyones gibayad sa utang sa NFA sa Bureau of Treasury ug ang nahibiling P2 bilyones gibayad sa ilang utang sa Land Bank of the Philippines ug sa Development Bank of the Philippines.
Nipasabot ang NFA nga naneguro sila og bayad sa utang aron di mapahamtangan og surcharges sa nagbuntaog nilang utang. Apan gitataw sa COA nga di ni balidong sukaranan pagsakripisyo sa suplay sa NFA rice.
Di sab kapangangkon si Aquino nga naningkamot siya sa pagpahiyos sa utang sa NFA. Kay ang iyang pagpamugos sa government-to-government (G2G) nga importasyon, bisan sa pagsupak sa economic managers ni Presidente Rodrigo Duterte, nakapasamot sa pagburot sa utang nga sa labing uwahing ihap niabot na og P180 bilyones.
Apan giduphan ni Presidente Duterte si Aquino. Mao nga, sama ni Communications Assistant Secretary Mocha Uson, way makatandog niya. Bahala na kon padayong nagsangkiig ang mga konsumidor sa kamahal sa commercial rice tungod sa iyang maniobra.