Gipangluba nga bodyguards
Kon buhi pa lang unta silang Bernard Liu ug Ananias Dy, ang nangangkon nga bodyguards sa gipasanginlang drug lord nga si Peter Lim, makatabang unta sila sa pagpalig-on sa kaso batok sa Sugbuanong negosyante nga wa gihapon madakpi sa kapolisan usa ka semana human siya gipadakop sa korte.
Nitiyabaw si Lim ug iyang mga abogado nga taphaw ang mga ebidensiya nga gihuptan sa gobyerno sa pasangil nga apil sila sa konsabo sa negosyo sa ilegal nga drugas. Mas abunda ang mga detalye sa mga pasangil nilang Liu ug Dy batok ni Lim.
***
Nikumpisal si kanhi kongresista Antonio Cuenco, ang nihingan ni Lim nga drug lord 16 ka tuig ang nilabay, nga sakop sa media ang nipahibawo niya sa kaandam nilang Liu ug Dy pagtug-an sa mga tinagoan sa ilang amo.
Gihangop ni Cuenco ang ilang testimoniya sa imbestigasyon sa iyang giduma nga House Committee on Dangerous Drugs batok nilang Lim ug ubang gipasanginlang drug lords sa Sugbo. Niangkon hinuon si Cuenco nga wa lihoka sa kapolisan ug National Bureau of Investigation ang mapuslanon untang kasayuran nilang Liu ug Dy.
***
Gibasol sab ni Cuenco ang giingon niyang taphaw nga pagpatuman sa Witness Protection Program (WPP) sa Department of Justice nga nagsugod niadto lang 1991 sa kapakyas pagpanalipod nilang Liu ug Dy.
Kinsa gipaubos sa WPP sud lang sa tulo ka buwan human sila niatubang sa mga kongresista. Matod ni Cuenco gitangtang silang Liu ug Dy sa WPP kay wa man g’yuy kaso nga napasaka ang kapolisan ug ang NBI batok ni Lim.
Gipatay si Dy sa Labangon, Cebu City, niadtong 2006, upat ka tuig human sa iyang testimoniya batok ni Lim. Samtang gipatay si Liu sa Tangke, Talisay City, niadtong 2011, siyam ka tuig human sa iyang pag-atubang sa komitiba ni Cuenco.
Matod ni Cuenco iyang giawhag ang kapolisan pagsusi sa posibleng kalambigitan sa kamatayon nilang Liu ug Dy sa ilang testimoniya batok ni Lim. Apan sama sa ilang pakisusi sa mga pasangil batok ni Lim way mga kaso nga napasaka. Ug kay patay na man, ang affidavits nilang Liu ug Dy batok ni Lim di na magamit sa hukmanan.